Lunglei Municipal inthlan hun turah SEC-in Mizoram sorkar a la ráwn nawn lo

State Election Commission (SEC) chuan Lunglei Municipal Council (LMC) inthlan buatsaih hun turah Mizoram sorkar ṭum khat a ráwn tawh a, a hnuah a la ráwn nawn leh lo.

Vanglaini palai zawhna chhangin state election commi­ssioner (SEC) Laima Chozah chuan, LMC inthlan hun turah ṭum khat an ràwn bak chu Mizoram sorkar an la ràwn nawn leh loh thu a sawi a, "LMC office an hawn hun kan nghak a, an hawn hunah kan ráwn leh ang," a ti.

Laima Chozah chuan, tun thla tàwp lamah chuan Mizoram sorkar ràwn leh an tum thu sawiin, "Office an hawn hman tawh dawn avangin tun thla tàwp lamah kan ráwn leh ang," a ti a; January thla tàwp lamah chuan LMC inthlan hun tur hriat theih a nih a beisei thu a sawi.

LMC inthlan hun tur tifel turin dan chuan SEC-in Mizoram sorkar a ràwn a phût a ni. LMC office hi vawiinah UDPA changtu deputy chief minister Tawnluia'n a hawng dawn nia thu dawn a ni.

SEC chuan, LMC inthlan hun tur chungchangah, a hun tur sawipui turin Mizoram sorkar chu ṭum khat an sáwm tawh a, mahse, sorkar chuan an la inpeih loh thu October 6, 2022 khan SEC a hriattir thung.

Danah chuan, LMC inthlan hi LMC din a ni tih hriattirna, noti­fication a chhuah aṭanga kum khat chhungin buatsaih tur a ni a; hei vang hian inthlan buatsaihna turin March 2023 thleng hun a awm a ni.

SEC chuan, LMC inthlana hman turin electoral roll a buat­saih zo tawh a, final electoral roll pawh October 14, 2022 khan tlangzarh a ni tawh bawk.