January 2022 - January 2023 chhungin Aizawl dist-a chhiatna thlengah mi 6 thi

Aizawl District Disas­ter Management Autho­rity (ADDMA) hotute nimina an ṭhutkhawm­naah, kum 2022 chhung leh kuminah nimin thleng khan Aizawl district-ah lung lum, leimin, leikhi leh kângmei avangin chenna in 32 a chhia a, mi paruk an thih phah bakah, mi pariat an hliam tih tarlan a ni.

ADDMA ṭhutkhawm hi Aizawl SP conference hall-ah neih a ni a, chair­man Dr Lalhriatzuali Ralte, bawrhsapin a kaihruai. Ṭhutkhawma tarlan danin, Covid-19 kaihhnawihah Aizawl district chuan Chief Ministers Relief Fund aṭangin Rs 8,80,94,878, PM Cares aṭangin Rs 2,79,80,224 leh State Disaster Response Fund aṭangin Rs 3,86,69,649 a hmu a, a vaiin Rs 15,47,44,751 a ni.

Ṭhutkhawmah hian, Mizoram sorkarin Mitiga­tion Fund atana rua­hmanna thehlut tura a tih angin zonal officer leh LC/ VC leh AE/ JE ten Aizawl district-a chhiatna thleng mai thei hmun hlauhawmte zawn chhuah a, thawm ṭhat dan tur an ruahman a; tun dinhmunah Aizawl district atan work proposal 200 chuang thehluh a ni tawh.

Capacity Building hnuaia training leh semi­nar huaihawt te, mipui zirtirna pek chungchang te, earthquake mock drill leh thil pawimawh dangte sawiho a ni bawk.