BRO hotute hrem a ṭul thu Rajya Sabha MP-in thlen

Rajya Sabha MP K Vanlalvena chuan January 11, Nilaini khan Union Defence secretary Giridhar Aramane a hmu a, Sangau-Saisihchhuah kawngpui thlûr (lane) hniha laih tura hna thawktu Border Road Orga­nisation (BRO) hotu ṭhenkhat lakah discipli­nary action lak ṭul a tih thu a thlen.

MP K Vanlalvena chuan, kum 2020-ah Minis­­try of DoNER-in North Eastern Council (NEC) kal­tlangin Mizoram chhim­chhak lam leh Myanmar-a Chin Hills khawpui Hakha inkal pawhna tur Sangau-Saisihchhuah kawngpui thlûr hniha laihna tur cheng vbc. 66 a rawn pek tawh thu a tarlang.

K Vanlalvena chuan, "He hna thawk tur hian BRO chu DoNER-in a thlang a, Hakha aṭangin Saisihchhuah hi China puihnain Myanmar sorkar chuan kum thum kal ta khan kawngpui thlur hnihin a rawn lai tlang daih tawh. Kawng laihna atana sum pek chhuah a nih hnu kum hnih aia rei a liam tawh a, BRO hian metre khat leka thui pawh kawng an la lài lo," a ti a, chuvang chuan, sum pek tawh chu hnuh lêt tura ruahman mek a nih thu a sawi.

BRO-in hma an la lo chu Mizoram mipui hmasawnna ngaihthahna leh ram leh hnam himna (national security) ngaih pawimawh lohna lian tak a nih thu sawiin K Vanlalvena chuan, "He thila mawhphurtu BRO hotute chungah action lâk chu tihmâkmawh a niin ka hria," a ti.

Rajya Sabha MP chuan, Champhai-Siaha defence road thui tak laih tawh leh hun leh sum tam tak sên ral tawhna ni si, Thingsai leh Pangkhua inkar kawng laih tur thawk duh lo a, kum tam tak hna an chawlh tawh hnuah BRO chuan an tàwpsan ringawt thu a sawi a; BRO hotute'n tribal mipui hmasawnna ngai pawimawh loin, ram leh hnam himna an ngaihthah tih a chian thu te, a rang thei ang berin disciplinary action lak chu thil tihmâkmawh a nih thute Defence Secretary a hrilh bawk.