Sorkar kum tharah chhungkaw 60,000 aia tam SEDP kan pe dawn - Tawnluia

MNF senior vice presi­dent leh deputy chief minister Tawnluia chuan, sorkar kum tharah chhung­kaw 60,000 aia tam hnenah SEDP ṭanpuina an pek dawn thu a sawi nawn a; kum 2023 chu MNF-in malsawmna hrang hrang an dawn kum a nih zel dawn thu a sawi bawk.

Tawnluia hian nimin khan Lungleia Mizo Hnam Rûn hawngin thu a sawi a, "SEDP hmangin chhungkaw 60,000 bul kan ṭansak mek a, first phase second instalment kan pe leh dawn. Sorkar kum tharah chhungkaw 60,000 aia tam hnenah SEDP kan pe leh dawn a ni," a ti.

MNF chu Mizo hnam hma hruaitu a nia sawiin Tawnluia chuan, "Lalpa hming lam chungin kan kal zel ang a, kumin 2023 hi hnehna hrang hrang kan chan kum, malsawmna hrang hrang kan dawn kum a ni zel dawn," a ti a; Mizote leh Mizoram tan an kal zel dawn thu a sawi.

Tawnluia chuan, Lunglei municipal chungchang sawiin, "Lunglei hi village lian tak inhlâwm khawma awm khawm ringawt a nih hi sorkar ang pawhin Mizoram khawpui pahnihna hi lainatawm kan ti. Mahnia ro inrêl theihna khawpui, mahni sum leh pai hman tur insiam thei khawpui a nih theih nan municipality hi i kalpui teh ang u, tiin LMC chu kan hawng dawn ta a ni," a ti.

MNF Sr Vice President chuan, kumin 2023-ah MNF-in sorkarna an siam leh ngei ang tih ring turin an party mite a chah a, "Kawng laka hnutchhiah mai turin Pathianin min dah miah lo ang," a ti a; chutih rualin, mawhphurhna an neihte hria a, chhel tak leh taima taka hna thawk turin a fuih.
Inkhawmah hian MNF treasurer K Vanlalauva leh adviser C Lalrinsanga, minister te pawhin thu an sawi a ni.