Skywalk leh ropeway chhuina report zirchian leh mek a ni

Anti Corruption Bureau (ACB) chuan Chal­tlang leh Durtlang inkara ropeway siam tur leh Sakawrhmuituai tlanga skywalk siam tur chungchang an chhui zo tawh a, dan lam thiamte nen an chhuina report an zir chiang mek.

Vanglaini palai zawh­na chhangin ACB hotute chuan, thubuai an chhuina report an zir chian leh thu an sawi a, "Skywalk leh ropeway chhuina report pawh zir chian leh mek a ni. Kan zirchianna aṭangin chhui belh ngaite a awm thei a, chuvangin, Lokayukta-a report kan thehluh hun tur sawi theih a la ni lo," an ti.

Tarlan tawh angin, MNF party-a Vigilance department leh Legal Board-te chuan skywalk leh ropeway siamnaah thil dik lo a awm nia ngaiin November 22, 2021 khan Lokayukta-ah complaint an thehlut a ni.

December 7, 2021 khan chhui phal dilna Mizo­ram sorkara Vigilance department-ah theh­luh a ni a; Vigilance-in a zir chian hnuah December 17, 2021 khan chhui phal­na a tichhuak a, ACB chuan December 22-ah chhui phalna an dawng.

Tourism department pawhin skywalk leh ropeway chungchang hi chhui chian ṭha an tih avangin an Director hmingin February 3, 2022 khan Lokayukta-ah an thlen ve bawk.