Aizawla parking fee khawntute'n thla tin AMC-ah Rs 7,09,250 an thehluh a ngai

Aizawl Municipal Corporation (AMC) chuan Aizawl khawpuia man chawia lirthei dahna (parking area) 51 a siam a, parking fee khawntu (collector)-te'n thla tin AMC-ah Rs 7,09,250 an chhûn luh a ngai.

RTI Act hmanga zawhna AMC SPIO-in a chhàn danin, Aizawl khawpuia parking hmun 51-ah two wheeler 1,704, taxi 505, LMV 404, two wheeler taxi 231, pickup 19, HMV 16 leh autorickshaw 65 dah theih a ni a; hmun 65-ah general parking a awm. Parking area siam belh tumna a awm rih lo.

AMC parking area-a parking fee khàwn hian AMC staff duty, AMC councillor/ corporator, minister/MLA, fire brigade, ambulance, police, armed forces, civil defence organisation, MJA member, dâk-pú leh AMC-in phalna a pek lirtheite a huam lo a ni.

April 1, 2022 aṭanga March 31, 2023 chhung atana parking area 51-a parking fee khawntu (collector) tur thlang turin March 14-23, 2022 khan tender chhuah a ni a, mi 305-in tender an chháng. Mi 305 aṭangin collector atan mi 51 thlan a ni.

Parking collector-te'n AMC-ah thla tin tender an chhanna (bid price) zel an thehluh a ngai a, an tender chhan zat belhkhawm chu Rs 7,09,250 niin, hemi zat hi AMC-ah an thehluh a ngai a ni.

Parking area 51-ah hian lirthei dahna leh lirthei kaihhnawih atana hman hmun 532 siam a ni a, chu'ng zingah chuan pickup & dropping zone, city/line bus stand, taxi stand, sanitation point, gas point, etc. a awm.