KHAWTHLIR

February 7 atangin Budget session
Mizoram Legislative Assembly pariatna ṭhutkhawm vawi 11-na, budget session ni bawk chu February 7, 2023 chawhma dar 10:30-a ṭan turin Governor-in a ko. Governor Dr Hari Babu Kambhampati hian nimin khan hriattirna a chhuah a, session rei zawng tur tarlan a ni lo. Session neih hun chhung tur leh neih dan turte chu Speaker hoin la ngaihtuah a ni ang.

KTP-in thisen pe
KṬP, Saikhamakawn Branch chuan an branch din champha pualin nimin khan Synod Hospi­tal tan thisen unit 37 an pe a, petute mipa 27 leh hmeichhia 10 an ni.

Sawiselna sawiho
Serchhip district Competent Authority for Land Acquisition (CALA) Nazuk Kumar, district bawrhsap pisaah nimin khan sawiselna lut sawiho a ni a, additional DC Lalmuansanga Ralte leh SDO (Sadar) Lalzikpuii te an tel. Serchhip district-a National Highway no. 54 zauh hna thawh meka ram lâk chungchangah, Keiṭum khua aṭangin sawiselna (objection) a lut a, chungte chu mimal pakhat leh pawl pakhat thehluh niin, nimin khan an ngaihtuah a ni.

National Youth Day
National Youth Day vawi 39-na chu nimin khan Lawngtlaia Nehru Yuva Kendra huaihawtin Vista English School, Lawngtlai College Vengah hman a ni a, Lawngtlaia IPRO C Lalhruaitluanga'n National Youth Day thupui 'Developed youth - Deve­­loped India' tih a sawi.

Health clinic centre
Lengteng bialtu MLA L Thangmawia chuan nimin khan a bial chhunga Puilo khuaa health clinic centre thar a hawng. Health clinic centre thar hi
DBL Company-in CSR fund an pek Rs 6,00,000 hmanga sak a ni a; health worker pakhat leh thawktu dang pakhat dah nghal a ni.

Pension scheme hmasaa awm duh
Mizoram sorkara thawk, New Pension Scheme hnuaia awmte chuan tun hnai khan Mizoram Movement for Old Pension Scheme (MIMOPS) páwl an din a, pension scheme hmasa, CCS Pension Rules, 1972 hnuaia an awm theih nan hmalak an tum. Mizoram sorkara thawk zingah New Pension Scheme hnuaia awm mi 9,000 chuang an awm a ni.

Kawng khâr dawn
January 12-31, 2023 chhungin Meidum leh Hortoki inkar kawngpui siam a nih dawn avangin Kolasib SP Vanlalfaka Ralte chuan lirthei tlân dan tur a tichhuak. Kolasib SP-in ruahmanna a siam dan chuan Thawhṭanni, Thawhlehni, Ningani leh Zirtawpniahte lirthei kal theih lohin kawngpui khâr a ni dawn tih a tarlang.

CM-in hawng
Chief minister Zoramthanga chuan nimin khan a bial, Aizawl East-I chhunga Sihphir khuaah VC House leh Rohrenga Hall a hawng. VC House hi Local Administrative department aṭanga hmuh cheng nuai 10 hmanga sak a ni a, hall chu khawtlang bazar building awm sa chungah bank loan hmanga sak a ni.