Road Safety Week, 2023 hawn a ni; Driving license 4,71,095 pe tawh

Transport minister TJ Lalnuntluanga chuan nimin khan Vanapa Hall-ah Road Safety Week 2023 a hawng a, Transport department hnuaia thawkte inhlan tharna hun a hmanpui nghal. Nikum thleng khan Mizoramah driving license 4,71,095 pek chhuah a ni tawh.

Transport director R Lalrammawia tarlan danin, December 13, 2022 thleng khan Mizoramah driving license 4,71,095 pek chhuah a ni tawh a, lirthei 2,78,144 ziah luh (register) a ni tawh bawk.

Minister TJ Lalnuntluanga chuan, Road Safety Week pualin lamliana chetsualna laka him theih nan leh chetsualna hrang hrang pumpelh a nih theih nan danin a phal loh - rûi chunga lirthei khalh lo leh traffic dante zâwm turin mipui a chah a; lirthei hlui hralh chhawn a nih hnua lirtheiin tawhsual a tawh palha an buai loh nan a neitu hming thlâk (ownership transfer) ngei turin mipui a ngen.

TJ Lalnuntluanga chuan, dan zâwmtute tan dan thar ṭhenkhat chu a hlauhawm lo tih a sawi a; social media zalenna hman thiam leh hmang ṭhat kawngah Transport department thawktute chu fakawm a tih thu sawiin, sorkar hnathawkte'n an tih tur an tih mai hian ram rawng an báwl a ni tih hre reng turin a chah.

Transport Minister chuan department-a thawkte chu mipui rawngbawltu an nih avangin ṭan la thar turin a chah a, "Dan hnuaia awm kan ni tih inhriain, department hmalakna tura ruahmante danin a phal chinah hma kan la zel ang a, theihtawp kan chhuah ang," a ti.