Myammar-in Mizoram (India)-a bomb a thlâkah hma la turin YMA-in India phût

YMA, Tuipuiral Group chuan thuchhuah siamin, Myanmar sipaite'n jet fighter hmanga Mizoram chhunga bomb an thlâk chu an dem thu an tarlang a, Mizoram tana hlauhawm thei khawpa Myanmar sipaite'n bomb hmanga ramri báwr vel an bei chu tihtàwp a nih theih nan hma la turin India sorkar an phût.

Tuipuiral Group YMA chuan, January 10, 2023 tlai dar 3:30 vel khan Myanmar sipaite'n jet fighter leh bomb hmanga Indo-Myanmar ramri bula Chin National Front camp - Camp Victoria an beihnaah Mizoram chhungah bomb an thlâk tih sawiin, an dem thu an tarlang a, "Mizoram chhungah bomb an thlâk mai bakah, bomb hian Ṭiau lui bula balu la mektu India lirthei pakhat a tichhia a ni," an ti.

Myanmar sipaite'n India zah lo takin India ram chin bul velah jet fighter an thlawhtir fo tawh tih sawiin Tuipuiral YMA chuan, "Thla hnih kal ta chhungin vawi tam tak India leilung lamah an thlâwk tawh a, India leilungah bomb an thlâk ta hial a; hei hi India ram beihna a ni. India (Mizoram) chhunga ramri bul hnaihah mi tam tak an chêng a, chu'ng mite leh ramri bula loneitute leh balu la ṭhinte tan a him lo hle a ni," an ti a; ramri hnaiha hna thawk ngam rih loh mi eng emaw zat an awm phah tih an tarlang.

Tuipuiral Group YMA chuan, Myanmar sipai sorkar chêt dan chu international law bawhchhiatna a nih thu leh an dem tak zet thu an tarlang a, "Myanmar sipai sorkarin an jet fighter-te India ram china an thlawhtir leh India ram chhunga bomb an thlâk chungchangah hian hma la turin India sorkar hi na takin kan phût a ni," an ti bawk.