Tar, hmeithai leh rualbanlote ṭanpuina pe vat turin sorkar phût

Mizoram Pradesh Youth Congress Committee (MPYCC) chuan, Mizoram sorkarin tun thlenga tar pension, hmeithai leh rualbanlote hnena thla tina a pek tur ṭanpuina sum a la pe lo chu pawi an tih thu an tarlang a, a rang thei ang bera pe turin sorkar an phût.

MPYCC chuan, National Social Assistance Programme (NSAP) hnuaia ṭanpuina sorkar laipui aṭanga kal chu Mizoram sorkarin September 2022 thla thleng chauh state matching share a la pe tih an tarlang a, "Central sorkarah a changtu minister-te'n an nawr zui loh avangin tar, hmeithai leh rualbanlote an khawngaihthlak hle. An innghahna ve ber a hun taka an hmu thei lo hi pawi kan ti a, an thlavâng kan hauh tlat a ni," an ti.

Zoramthanga kaihhruai sorkarin sum a enkawl thiam lohzia a lang nawn leh ta nia sawiin MPYCC chuan, "Chief Minister leh a sangawi zawnpui contractor-te'n vaibelchhe téla bill an lâk ṭhin laiin, tar, hmeithai leh rualbanlote lawmman mi pakhatah Rs 1,000 vel pawh an pe thei lo hi lungchhiatthlak kan ti tak zet," an ti a; MNF sorkar chu tar, hmeithai leh rualbanlote tana innghahna tlak a nih lohzia a chiang hle niin an tarlang a ni.