May 31 thleng inkhârkhip dawn
Mizoram pumah May thla chhung zawng inkhârkhip a ni dawn. Hetih lai hian, Aizawl khawpui chhunga tualchhung kohhran hrang hrang 51-in an hmunhmate quarantine facility atan hman an remti a, a kalphung tur erawh puanchhuah a la ni lo. India ram puma inkhârkhip thawh thumna kal mek hi May 17, Pathiannia tàwp tur a ni.
Inkhârkhip chhunzawm dan tur leh a kalphung turte ngaihtuahtu State Executive Committee leh task group hrang hrangte nimina chief secretary Lalnunmawia Chuaungo hoa Secretariat conference hall-a ṭhukhawm chuan May 18-31 chhung inkhàrkhip chhunzawm an rél a ni.
Nimina ṭhutkhawmnaah hian, Aizawl khawpui chhunga tual chhung kohhran hrang hrang 51-in an hmunhmate state páwn aṭanga rawn haw tharte khung hranna (quarantine facility) atan hman an remti tawh tih an tarlang a; tangkhang lo haw tur an pung zel dawna a lan avangin screening point-a medical duty dah belh an rél.
PMGKY hnuaia insurance-in a huam zingah hripui donaa a hmatáwnga thawk, Covid-19 vei direct contact ni lote huamtir theih dan tur ngaihtuah ṭha an ti. Insurance-in a huam tura an duhte chu - police, task force, damdawi-in leh quarantine centre-a bawlhhlawh la khawmtu leh paihtute leh, sorkarin hna thawk tura a chhawrte an ni. Bawhzui tur hianTask Group on Insurance an ruat a ni.
Tarlan tawh angin, Ningania chief minister Zoramthanga hoa Assembly speaker Lalrinliana Sailo, minister, sorkar official-te leh political party, All NGO Coordination Committee, Mizoram Kohhran Hruaitute Committee, Mizoram Journalist Association, Mizoram Govt. Doctor Association leh Indian Medical Association (Mizoram Branch) hruaitute ṭhukhawm chuan inkhârkhip zel an rél a ni.
Meeting-a an rêl leh sawite
. Aizawla tualchhung kohhran 51-in an hmunhmate quarantine facility atan hman an remti tawh.
. Tangkhang lo haw tur an pung zel dawna a lan avangin screening point-a medical duty dah belh.
. Rapid Antibody Test (RAT) hmanga endik chu a tira tih bak chu Covid-19 symptom an nei a nih loh chuan tih nawn ngai lo tura ngaih a ni. Quarantine facility aṭanga home quarantine tura chhuah phalsakte chu an chhuah hmain RAT tih a ṭul.
. State páwn aṭanga lo hawte chu quarantine facility-a lut loa home quarantine nghal an duh a nih chuan screening point-a endiknaah RAT non-reactive (fihlîm) an nih a ngai a, DC leh an awmna khua/veng task force-te remtihna an lak a ngai bawk.
. Jharkhand-a haw tur hnam dang mi 81 chu Mizoram aṭanga thawn chhuah an ni.