Mizo siam hmai tuamna 50,000 lei tawh

Covid-19 laka invènna tur hmanrua chi hrang hrang tualchhunga siam chhuahna tihhmasawnna tura hma la tura Mizoram sorkarin April 13, 2020-a a din, Committee for Promotion of Locally Manufactured Protective Gears' (CPLMPG) chuan Chief Minister's Relief Fund aṭanga sum an hmuh Rs. 5,00,000 hmangin tual­chhunga siam chhuah hmai tuamna 50,000 an lei tawh.

CPLMPG secretary J Hming­thanmawia, Com­merce & Industries direc­tor chuan Vanglaini palai zawhna chhángin, mipui himna leh ngaihṭhatna chu an thupui pakhat a nih thu a sawi a, "Keini Committee hian WHO-in hmai tuamna siam dan tur a tih ang thlapin kan siamtir a, a ṭhui laiin mi tam takin an khawih avangin an ṭhui zawh vek hnuah natna laka a him theih nan kan sterilise vek zel," a ti.

CPLMPG-in a tum ber chu - puan ṭhuitute tan inkhàrkhip laia eizawnna siam­sak a nih thu sawiin J Hmingthanmawia chuan, "Inkhàrkhip vangin Mizo­rama puan ṭhui thiam tam takin hna an thawk mumal thei lo a, chu chu hriain an tan hna kan siam a ni," a ti a; puan tahtute tan pawh rua­hmanna an siam thu a sawi.

J Hmingthanmawia chuan, WHO-in 100% cotton puan chu hmai tuamna puan atan a pawm tih sawiin, "Phai aṭanga chah luh reng ai chuan Mizorama puan tah thiamte tahtir ve turin hma kan la mek. Chumi hmang chuan Mizoram chhung ngeia Mizote'n an siam invenna hmanruate tláwm leh hnianghnâr zawka neih a awlsam phah dawn a ni," a ti.

CPLMPG Secretary chuan, tualchhunga siam zingah a him tâwk lo leh WHO-in an pawm ang ni loa siam an awma an hriat thu sawiin, "Mipui himna leh an ngaihṭhatna kan duh ber a, chuvang chuan sorkar angin hma kan la a ni," a ti.

CPLMPG-in CM Relief Fund aṭanga Rs. 5,00,000 an hmuh chu CM Relief Fund-ah vêk an chhûn lêt leh vek dawn thu Vanglaini palai a hrilh bawk.