Sample 273 endik a ni tawh

Zoram Medical College (ZMC) Covid-19 Testing Laboratory-ah nimin khan swab sample endik a awm lo a, nimin thleng khan Mizoram aṭangin sample 273 endik ni tawhin, chu'ng zinga sample 202 chu ZMC laboratory-a endik a ni a, Covid-19 kai hmuh belh an la awm lo.

State Referral Hospital (SRH)-ah nimin tlai dar 5 aṭanga a hma lam darkar 24 chhungin mi pali dah luh (admit) an ni a, chu'ngte chu Risk Ward-ah mi pathum leh Holding Ward-ah mi pakhat dah an ni. SRH-ah hian damlo Risk Ward-ah pathum, Make Shift ICU Ward-ah pakhat leh Holding Ward-ah mi 10 an awm mek a, an vaiin mi 14 an ni.

SRH-ah hian ward thar - Surgical Intensive Care Unit siam a ni a, khum pasarih dah theih niin, mamawh dan azirin Covid-19 vei damlo pawh enkawl theih tura peih a ni tawh.

Screening point hrang hrangah nimin khan tlai dar 5 thlengin state páwn aṭanga rawn lut mi 1,820 enfiah an ni tawh a; Rapid Antibody Test (RAT) hmanga endik mi 206, quarantine centre-a dah luh mi 39 leh home quarantine-a dah thar mi 20 an awm bawk.