Mizoramah voters 8,42,959 an awm; mipa aiin hmeichhe vote nei 19,551 in an tam

Nimin khan Mizoram district hrang hrangah Final Electoral Roll, 2023 tar chhuah a ni a, Mizoramah voter 8,42,959 an awm. Mipa aiin hmeichhe voter 19,551 in an tam zawk a ni.

Mizorama vote nei 8,42,959 zingah hian 4,13,954 chu mipa niin, 4,33,505 chu hmeichhia an ni. District 11 zingah Mamit district tih loah chuan mipa aiin hmeichhe vote nei an tam zawk vek.

Voter 8,42,959 zingah hian 5,071 chu service voter an ni a, service voter bikah hi chuan hmeichhia aiin mipa an tam a, mipa 4,984 leh hmeichhia 87 an ni.

District 11 zinga vote tamna ber Aizawl district-ah chuan voters 2,80,874 awmin, a tlemna ber Hnahthial district-ah chuan voters 15,985 an awm.

November 9, 2022-a tlangzarh Draft Electoral Roll-ah chuan Mizoramah voter 8,31,272 an awm a, voter zinga 4,03,927 chu mipa niin, 4,27,345 chu hmeichhia an ni a, mipa aia hmeichhe vote nei tam zawkna chu 23,418 a ni.

Chief Electoral Office, Mizoram chuan India khua leh tui dik tak, January 1, 2023 a kum 18 tling tawh, rokhawlhna avanga summary revision laia electoral roll-a inthun hman lo leh siamṭhat ngai siamṭha duhte chuan mahni bialtu ERO/AERO/BLO hnenah dilna thehluh theih a nih thu a tarlang.