Cheng nuai 643 man hu Police-in heroin an man

Mizoram Police chuan January 12, Ningani zan leh nimin zing khan hmun hnihah heroin (no.4) cheng nuai 643 man hu leh a kaih­hnawih mi pasarih an man.

Police thuchhuah tarlan danin, January 12, Ningani zan khan Aizawl Ṭhuampui Veng­ah Myanmar mi pahnih - Chinlamham s/o Chinhaulian leh Thang­siankhual s/o Pauhau te kut aṭangin heroin gram 126.65 (hawng 11), international market-a cheng nuai 63 man hu an man a, Special Narcotics PS-ah thubuai ziahluh niin an thlun zawmpui dangte chhui mek a ni.

Nimin zing khan Mamit district-a Luimawi khaw dáiah truck pakhat aṭangin heroin kg. 1.161 (hawng 89), international market-a cheng nuai 580 man hu an man.

Heroin kaihhnawihah hian lirthei khalhtu Lalrinfela (35) s/o Ro­chung­nunga, Zotlang, Aizawl bakah, a thurualpui Lalsangkima (39) s/o Lalthlanga, Ramrikawn Aizawl, Lalfelpuia (35) s/o Farliana, Zokhawthar, Sanglianthawn (36) s/o Thenliansiam, Pyin­khonegyi, Myanmar leh Lalrin­chhana (32) s/o Lalram­hluna (L), Vairengte Chhimveng te man an ni.