NGO-ten Myanmar sipaite chetdan Union HM hnena thlen an tum

NGO Coordination Committee chu nimin khan Central YMA pisa-ah an chairman R Lalngheta, CYMA president kaihhruaiin an ṭhukhawma, Myanmar sipaite chet dan Union Home Minister hnenah thlen an rêl.

NGO-te hian January 10 leh 11, 2023-a Myanmar sipaite'n thlawhtheihna hmanga India ram boruak rawn luta, India ram chhung ngeia bomb an thlak chung­chang an sawiho a ni.

Khawvel ram hrang hrangte'n democracy tundin leh duhin Myanmar sorkar an kawmserh nia tarlangin NGO-te chuan, "An ram chhung helte bei tura thawk chhuak Myanmar sipaite'n India boruak an rawn lut leh India ram chhung ngeia ṭum thum bomb an rawn thlak hi India ram himna tiderthawngtu niin kan ngai a, pawi kan tiin kan dem takzet," an ti.

NGO-te hian India ram himna leh zahawmna ven­him a nih zel theihna atana hma la tura India sorkar an phuta, Union Home Minister hnenah lehkha thehluh an tum a ni.

NGO Coordination Committee-ah hian CYMA, MUP, MHIP, MZP leh MSU-te an tel a ni.