Infiamna chawikan dan tur sawiho

Sports and Youth Services (SYS) secretary Dr Lalrozama kaihhruaiin nimin khan Champhai DC conference hall-ah Champhaia infiamna chawikân zel nana hmalâk ṭulte sawiho a ni.

SYS Secretary chuan, sports tihhma­sawn zel nan lungrual taka hmalak tlân a pawimawh thu a sawi a, "Inkaihhruaina duante hi a ṭul ang zela ṭhat tlanna tur tinzâwna ennawn leh siam rem zel theih a ni. Sports chawikân nan hun khawhral hman a ni lo a, infiammite hmakhua ngaia hun ṭha an neih chhunga an tana ṭha ber tur lam hawia ngaihtuahna sên tlân a ṭul," a ti a, infiamna hmangin eizawn­na, hriselna, inpumkhatna leh thawh­hona ṭha siam theih a nih thu a sawi.

District bawrhsap James Lalrin­chhana pawhin thu sawiin, Champhai district-ah sorkarin a pawmpui Sports Association 30 a awm thu leh District Sports Committee din a nih theih nan hmalak mek a nih thu a sawi a, "Sports infrastructure tihhmasawn nan project hrang hrangte siama thehluh a ni a, infiamna hmangin ṭhalai hrisel zawk, ruihhlo laka fihlim leh chhawrtlak chherchhuah kawngah ṭanlâk tum a ni," a ti.

Ṭhukhawm chuan Champhai district-a sports tihchangtluna chawisân a nih theihna tura pawimawh hrang hrangte an sawiho a; sorkar thuchhuah anga District Sports Committee (DSC) mumal tak dina, a nihna ang tur taka kalpui a nih theih nana hmalak chhun­zawm zel kawnga ṭulte an sawiho bawk.