Dy. Chief Minister-in LMC pisa a hawng; March chawhnuah inthlan theih a beisei

Deputy chief minister Tawnluia chuan nimin khan Lunglei Municipal Council (LMC) pisa a hawng. Dy. Chief Minister chuan, March thla chawhnu lamah LMC inthlan neih theih beisei a nih thu a sawi.

Tawnluia chuan, LMC inthlan chu Assembly Session zawh hnu March thla chawhnu lamah neih theih beisei a nih thu a sawi a, "A hun erawh sawi mai theih a la ni lo, Assembly Session neih zawh lam March thla chawhnu lam beisei a ni a, inthlanna neih a nih hma pawhin subject a neih ang angte chu theih ang angin tihlawhtling tura thawh nghal a ni ang," a ti.

MNF-in kum 2018 inthlan dawna an manifesto zinga mi thuneihna semzai tihpuitlin nana LMC hlenchhuah a nita nia sawiin Tawnluia chuan, "Khawpui tihhmasawnna tura sorkar laipuia Urban Ministry in ruahmanna a siam leh sum leh pai a pek chhuah ṭhin dawhthleng chu municipal a ni. VC ringawta kal chuan sum awm mah se, a dawhthleng a awm si loh chuan a ngaihna a awm lo," a ti a, tunhmaa awm ngai lo LMC office-ah officer leh thawktu ṭhahnem tak an awm thar ringawt pawh Lunglei tan thil hlu tak a nih thu a sawi.

Dy. Chief Minister chuan LMC-in subject 18 a enkawl dawn tih a sawi a, "LMC a taka kalpui a nih hunah chuan in sak chungchangah pawh dan hnuaiah vek thil tih a ngai tawh ang. Khawpui changkang leh awmze neia hmasawnna siam chu LMC hna pawimawh a ni a, ṭhangthar lo awm zel turte tan ngaihtuahna sên a ṭul. Khawvel ṭhang zelah faina leh thianghlimna kawng mai bakah, retheihna umbo tura kawng hrang hranga LMC kaltlanga hnathawh a ni tur leh NREGS dawng thei lo khawpa khawpuia kan awm hi lawmna cháng kan hriat a ngai a ni," a ti.

LMC pisa hawnnaah hian minister C Lalrinsanga, Lunglei HPC vice chairman Lawmawma Tochhawng, MLA; Lunglei bawrhsap Kulothungan A leh Lunglei district VC Association president H Lalremruata ten thu an sawi a; MLA pahnih Dr K Pachhunga leh Dr Vanlalṭanpuia te bakah, sorkar hotu te, political party hrang hrang aiawh, thuthar thehdarhtute leh mi pawimawh dangte an tel.