KHAWTHLIR

Thisen pe
St. John's Higher Secondary School NSS chuan nimin khan an sikulah thisen pek rûnpui an huaihawt a, Kolasib District Hospital tan thisen unit 80 an pe a, petute mipa 54 leh hmeichhia 26 an ni.

DC-in vailiam
East Lungdar khuaa Zotui Orange Producer Company Limited leh CBBO Clover Organic Pvt. Limited chuan nimin khan kuthnathawktute thar chhuah serthlum pum 9,500 chu Aizawla zawrh turin Aizawl an panpui a, Serchhip Sailiamkawn aṭangin disrtict bawrhsap Nazuk Kumar-i'n a vailiam.

Mock Excercise
Champhai District Disaster Management Authority (DDMA) leh 1st Bn. NDRF, Guwahati-te chuan January 12, Ningani khan Khawbung khuaah lirnghing avanga chhiatrupna thlen thulha chet lâk dan tur inzirtirna, Mock Exercise on Earthquake an buatsaih a; inven dan tur bakah, hliam sawngbawl dan hrang hrang leh chhan chhuah hna kalpui dan turte a tak ang thei turin an entir a ni.

Hnathawh tlawh
Public Health Engineering (PHE) secretary C Lalremsiama chuan January 10-13, 2023 chhung khan Champhai district-a PHE department hnathawk hrang hrang a tlawh a, khawtlang hruaitute leh PHE department lama thawktute chu mipui rawngbawl an ni tih inhre renga tha thlah loa ṭan la zel turin a fuih.

Minister-in hmanpui
Tuivai leh Tuiruang infinna hmuna Ruonglevaisuo Unau Suopui Kût 2023 neih mek chu nimin khan Tourism minister Robert Romawia Royte-in a hmanpui a, Ruonglevaisuo lungphun a hawng nghal. Inpumkhatna Kûtpui ni 3 awh tur hi January 12, Ningani khan Manipur Governor-in Parbung, Manipur-ah a hawng a ni.

DCSO-in hriattir
Lunglei DCSO chuan nimin khan AAY leh PHH chhungkuate'n tun thla aṭanga a thlawna buhfai an lak theih chungchangah thuchhuah a siam a; retailer-te chu AAY (ration card eng) leh PHH (ration card pawl)-te hnenah a thlawna buhfai sem vek turin a hriattir.