Kan boruak a ṭha, ṭan mar pât a ngai - ZPM President

ZPM chuan nimin khan an pisa-ah hmathar lâkna leh infuih tharna inkhawm an nei a, an president Lalliansawta chuan an party boruak a ṭha chho viau zel niin a sawi a, chutih rualin a tawp thlenga ṭan mar pat a ṭul thu a sawi.

Lalliansawta chuan Mizoram boruak an hriat tlân vek thu sawiin, "ZPM boruak a ṭha chho viau zel a, mite thinlung a inhawng zel a ni. Sorkarna la chelh ngai lo mi tharten kalphung thar nen sorkarna chelh ve se tih duhna a lian zel, mahse hei vang ringawta ngaihṭhat a hun lo," a ti.

Grassroot-te ṭang thei tura puih zel a pawimawh tih sawiin ZPM President chuan, "Kan hna hi a la tam khawp mai, kan ṭan mar pát a ngai. Rilru puitling tak pu ang u," a ti a, an party mite chu pá chan chang taka, Mizoram leh ZPM tana thil ṭha hlawhchhuak thei turin inthurual tak chunga hlim tlang takin kalphung thar sorkar siam tum turin a fuih.

ZPM President chuan Israel-te kha Josua hoin an ram va lâk tur leilungah an awm ṭhup tawh a, mahse an rilru a tuiral leh ṭhin a, an khur fo tih sawiin, "Josua chuan an chak lohna tur nia lang pawh Pathian thu angin a ti mai zel; thiltitheitu Pathian kha a hrechiang êm a ni," a ti.

Lalliansawta chuan Josua khan anmahni leh Pathian inkara thuthlung kha a ngaipawimawh ber tih sawiin, "Thil dang chu thil dang a ni. Chu Pathian chu kan Pathian a ni, inthlan lo awm turah pawh hian rorelna te, lalna te hi Pathian ta a ni tih kan hriat a ngai," a ti a, campaign-naah pawh Pathian lam hawi tur a nih thu a sawi.

Campaign Committee chairman K Sapdanga, working president chuan an hmalak dan sawiin, "Party dang zawng zawng aiin ZPM hi a thawkrim a, kalphung thar mipui sorkar din a tum tak tak a ni tih hi keimahni leh ram mipuiten an pawm thlap tur a ni," a ti.