Oil depot siam turin ngen

Rajya Sabha MP K Vanlalvena chuan nimin khan Union secretary of petroleum & natural gas Pankaj Jain a kawm a, Mizoram hmun pahnih - Bairabi leh Sihhmuiah te tuialhthei dahkhawlna, oil depot siam turin a ngen.

K Vanlalvena chuan, Mizoram chu tlang ram a nih avang leh fur ruahtui tlak tamna ram a nih avangtein ruah sur nasat hun lai (monsoon period) in tuialhtheiah harsatna a thlen fo thu a sawi a, "Meghalaya tlang ram leh North Cachar Hills-a national highway leh rel kawng ṭhat loh apiangin Mizorama tuialhthei phurtu tanker-te'n harsatna an tâwk ziah a ni," a ti.

Ṭhâl laia petrol leh diesel chhêk khawlna tur Mizoramah din thuai a ṭul thu sawiin MP chuan; tuialhthei dahkhawlna hmun tur atan rel chawlhhmun awmna Bairabi leh kum 2025-a rel chawlhhmun ni mai tawh tur Sihhmui chu hmun remchang leh ṭha ber nia a hriat thu Union Secretary chu a hrilh bawk.