DMR Minister hoin leimin chung-changah workshop neih a ni

Ministry of Home Affairs hnuaia National Disaster Management Authority (NDMA) leh Mizoram sorkar hnuaia Disaster Management & Rehabilitation (DMR) department chuan nimin khan Aijal Club-ah State Level Workshop on Landslide Risk Mitigation Scheme an buatsaih a, DMR minister Lalcham-liana'n a hmanpui.

Workshop hi DMR director Benjamin Lalzama'n a kaihruai a; DMR Minister chuan, Mizoram chu tlangram a nih avangin kum tin leimin avanga chhiatna hrang hrang a thlen ṭhin thu a sawi a, "Chhiatna a lo thlenin DMR department bakah a kaihhnawih department hrang hrangte'n rang takin chhawmdawlna hna an thawk ṭhin a, a lawmawm hle," a ti.

Sorkarin LRMS Project a kalpui thu sawiin Lalchamliana chuan, "Hemi project hnuaiah hian cheng vbc 21.02 hmangin Ramhlun leimin vanga chhiatna thleng leh Lapuitlang leimin vanga chhiatna tuartute chhawmdawl a ni a, kum 1990 aṭanga Hunthar Venga lei che ṭan tawh pawh DMR department-in a ṭul ang angte buaipuiin National Disaster Management Authority, aṭanga hmuh cheng vbc 20.86 hmangin ṭha taka siamṭhat a ni," a ti bawk.