Tihpalh sorkar tawp hun a ni ta - MPCC Vice President

MPCC chuan nimin khan an pisa-ah political session an nei a, thusawitu MPCC vice president Lal Thanzara chuan tihpalh sorkar tawp hun a nih tawh thu a sawi.

Lal Thanzara chuan MNF sorkar chu tihpalh sorkar a nih thu sawiin, "Tih palh sorkar MNF tawp hun a ni ta. Mipui nâwlpui zingah MNF sorkar nawn leh ring an awm tawh lo a, anmahni party mi ngei pawhin an in ring zo tawh lo. Inthlan hma a intiamna a hlawhchham vek avangin an tan beisei tur a awm tawh lo," a ti.

MNF-ten sorkarna an chelh tirh aṭang khan a hotulu ber aṭangin Minister rualten sorkar nawn leh tum tawh lo niâwm takin a theih theihnaah sum an ṭham bawrh bawrh nia sawiin Lal Thanzara chuan, ram hmasawnna tur tak tak ngaihtuah si loa an sum hmuhna tur contract hna insiamah sorkar hotute a puh.

MPCC Vice President sawi danin, sorkar hotute chetdan avangin sorkar hnathawkten a hun takah hlawh an la thei lo a, an pawisa lo khawl sa an GP fund pawh sorkarin a pe chhuak thei lo a ni. Contractor-te bill an batsak a, tar pension takngial pawh an pe thei lo. Kum 2022-23 chhunga leiba pawh cheng vaibelchhe 1119.2 a tling tawh.

ZPM chungchang sawiin Lal Thanzara chuan, "Enchhin tura in zuar mekte hi an hotute mipuiin kan lo enchhin tawhte vek an ni. An kum zat áwrh vote hmu ṭhin hruaitu, party hrang hranga awm kual a, enchhin tawh vek an ni. Mahni party din ngei pawh chhuahsan leh ṭhin hruaitute hi enchhin zel tlâk an ni lo," a ti.

MPCC Vice President chuan ZPM-te angin anmahni hmuh tur awm lo mi tam tak an lawmlut ve ngai lo nia sawiin, "Pathian malsawmna dawng tlâka hma kan lâk chuan Pathianin min pui ang," a ti a, mahni in dah hmasa loa ram leh hnam, sakhua himna leh zahawmna, a dinchhuahna dah hmasa turin an party mite a sawm.