CM vuakdûp a hlawhtlinna kan hmu chho ṭan mek - Prof. Lalnunmawia

MNF party chuan nimin khan an pisa-ah chhung inkhawm an nei a, thusawitu MNF adviser Prof F Lalnunmawia, MLA chuan Chief Minister-in Delhi-a a vuakdûp hlawhtlinna an hmu chho ṭan mek niin a sawi.

Prof. F Lalnunmawia chuan eptu leh mi ṭhenkhatin Chief Minister ṭawngkam 'vuakdûp' tih chu fiamthu thawhna atante an hmang tih sawiin, "Kan CM zahawm takin kan sorkar tirh lama Delhi tlânga a lo zu vuakdûp tawhte chu Covid-19 hrileng avangin khawtlai deuh mah se, tunah chuan a hlawhtlinna kan hmu chho ṭan mek a, fiamthu thawh nana hmangtute pawh tunah chuan an heh a hil ṭan ta," a ti.

MNF Adviser sawi danin, Mizoram hmasawnna tur cheng vbc. tam tak sênna tur project-te pawm a lo ni ta a ni. Chung zingah chuan Aizawl khawthlang lam leh hmar lama by-pass road-te, bamboo link road pilot project-te, Mizoram leh Manipur inkalpawhna leh hmar tlangdung aṭanga Bagha pawhna tur kawngpui te, Sustainable Aizawl Transport Project-te leh SASCI sum cheng nuai 39,412 hmanga hmasawnna ruhrel lian tham eng emaw zat siam tura hmalak mekte a tel a ni.

Media hmanga inbeihna a nasa hle tih sawiin Prof. F Lalnunmawia chuan, "Thudik a ni em tih pawh hriat mang loha sorkar beihna a tam hle. Puhchhiatna nasa tak hi sorkarna siamtute chanvo a ni fo ṭhin. Mi ṭhenkhatten MNF sorkar hnathawh ṭha tam takte sawi duh loin, rem leh rem loin sorkar leh ram hruaitute puhchhiatna tur hlir an zawng. Mi pangngai chinte chuan heng sawiselnate hi ngaihdan tâwk an nei vek," a ti.