Duhoma'n cultural day hmanpui

Serchhipa Little Flower Convent School chuan nimin khan Serchhip Sports Stadium-ah Cultural Day, 2023 an hmang a, bialtu MLA Lalduhoma'n a hmanpui. MLA hian school auditorium sak meka hman atan MLA fund Rs 3,00,000 a pe a ni.

Lalduhoma chuan, a bialin Mizorama sikul ṭha pawl Little Flower Convent School an nei chu lawmawm a tih thu a sawi a, "Hetiang sikul ṭha min din saktu Roman Catholic Kohhran leh Management Board-te chungah ka lawmthu hle. Ram changkang a piangah zirna leh hriselna lama hmalaknain ngaih pawimawh a hlawh a, kan ram pawhin hei hi kan mamawh em em a nih avangin hmalam pan zel kan ngai a, kei pawhin ka theih angin MLA Fund aṭangtein hma ka la ṭhin," a ti.

Khualzahawm Nazuk Kumar, district bawrhsap pawhin thusawiin, "Zirna hi classroom leh lehkhabuah chauh a innghat thiang loa, kan naupangte hi nunkawng leh hriatna dang tam tak kan hlanchhâwn a ṭul a ni. Chûng kan hlanchhâwn tur zinga pawimawh tak pakhat chu kan hnamziarang leh kan thu leh hla hluite an ni," a ti a, naupang zual deuhte zirtirna kawngah playway method hman uar ṭul a tih thu a sawi.

Little Flower Convent School hi kum 1976-ah din a ni a, naupang tê zual zirtirna Kindergarten aṭanga pawl 8 thleng awmin, zirlai naupang 942 leh zirtirtu 30 an awm mek a ni.