Admission tih rih loh tur

School Education department chuan nimin khan sikul hawn theih hun tur leh admission tih theih hun tur chungchangah thuchhuah a siam a; sorkar leh mimal higher secondary school zawng zawngte chu Covid-19 léng leh inkhàrkhip avangin pawl 11 admission la ti rih lo turin a hriattir.

Education depart­ment thuchhuahin a tarlan danin, sikul hawn hun tur leh admission tih theih hun turah sorkar thuchhuak ngaihchân tur a ni a, buai lo turin mi tin an ngen. Hetih lai hian, sorkar primary school leh middle school naupangte chu admission tifel tawh tura ngaih an ni a, la ti fel lo an awm chuan task force-te ráwn chunga lo enfel turin zirtirtute hriattir an ni.