Kum 2022-ah Aizawlah lirthei dan zâwm lo 18,334 man; cheng nuai 82 chuang chawitir

Kum 2022 chhung khan Aizawl khawpuiah lirthei dan zâwm lo 18,334 man a ni a, an pawisa chawi tling khawm chu Rs 82,70,000 a ni.

Traffic Police hotute hnen aṭanga thu dawn danin, January-December 2022 chhunga Aizawla lirthei dan chi hrang hrang zâwm lo 18,334 man zingah July thlaah dan zâwm lo man tam berin, 1,990 man a ni a, November thlaah 1,139 man niin, a tlem ber thla a ni.

Lirthei dan zâwm lo zingah two wheeler tam berin, 12,562 a ni a, lirthei man zawng zawng 18,334 aṭangin 68.51% a tling. Medium motor vehicle (MMV) 39 man niin, a tlem ber thung.

September 1, 2022 aṭanga lirthei dan zâwm lote na zawka hremna dan thar, Motor Vehicles (Amendment) Act, 2019 hman a nih hnuah lirthei dan zâwm lote pawisa chawi a létin a pung a ni.

Motor Vehicles (Amendment) Act, 2019 hman ṭan a nih hma, August 2022 khan lirthei dan zâwm lo 1,899 man niin, an pawisa chawi chu Rs 5,05,100 a ni a; September 2022-a MV (Amendment) Act hman a nih ṭan thlaah khan dan zâwm lo 1,789 man niin, August thla aiin 110-in tlem zawk mah se, September thlaa pawisa chawi zat chu Rs 12,75,500 a tling a, kum 2022 chhunga pawisa chawi a tam ber thla a ni.

MV (Amendment) Act, 2019 hman a nih hnuah pawisa chawi zat tam mah se, October, November leh December-ahte lirthei dan zâwm lo man zat a tlahniam a, November thla kha nikum chhunga lirthei dan zâwm lo man tlem ber thla a ni.