Covid-19: Mizoramah ni 78 chhung hripui vanga thi an awm tawh lo
Mizoramah Covid-19 swab sample endik awm ve reng mah se, thla khat chuang hripui vei hmuh a ni tawh lo a; ni 78 chhung Covid-19 vanga thi an awm tawh lo.
IDSP, Mizoram aṭanga thu dawn danin, Mizoramah ni 78 chhung Covid-19 vanga thi an awm tawh lo a, hripui vanga thi an awm hnuhnun ber ṭum chu October 29, 2022 kha a ni a, nikum November leh December bakah, kuminah hripui vanga thi an la awm lo a ni.
Mizorama Covid-19 positive hmuh hnuhnun ber chu December 12 kha a ni a, ni 34 chhung hripui vei hmuh a ni tawh lo. Chutih laiin, sample endik erawh a awm ve reng a, endik erawh a tam lo thung. December 17, 2022 aṭanga tun thlengin Mizoramah hripui vei an awm tawh lo bawk.
Kumin 2023-ah Covid-19 positive hmuh an la awm lo a; December 2022 chhung khan mi 10 chiah hmuh chhuah a nih bakah, nikum November khan mi 144 leh October thla khan mi 364 hmuh a la ni thung.
Mizoramah swab sample 19,93,083 endik tawh zingah Covid-19 vei mi 2,38,964 hmuh chhuah a ni tawh a; mi 2,38,238 (99.7%) chu dam taka chhuakin, mi 726 (0.3%) an thi a ni.
Covid-19 lèn ṭan kum, 2020 chhung khan sample 1,79,810 endik aṭangin hripui vei mi 4,216 hmuh chhuah a ni a, hripui vangin mi pariat an thi.
Kum 2021 chhungin sample 13,27,398 endik aṭangin Covid-19 positive 1,37,449 hmuh a ni a, hripui vangin mi 537 an thi.
Nikum 2022 chhung khan sample 4,85,757 endik niin, Covid-19 vei mi 97,299 hmuh a ni a, hripui vei zinga mi 181 an thi a ni.