Congress hunlaiin treasury vawi 30 chuang khar - MNF Vice President; 1998-ah treasury khâr, khâr hun chhung hriat a ni lo - RTI chhanna

Mizoram state a nih hnuah sorkar treasury-te kum 1998 khan khâr a lo ni tawh a, khâr a nih hun chhung erawh record hmuh tur a awm lo. Hetih lai hian, MNF vice president Lalthlengliana chuan, Congress party an sorkar laiin Mizoram sorkarin sum a neih loh avangin vawi 30 chuang treasury khâr a nih thu a sawi.

Mizoram chu Feb-ruary 20, 1987-a state a nih aṭanga tun thlenga Mizoram sorkar treasury-te khâr a nih tawh dan RTI Act hmanga zawhna chhangin Finance department chuan, "Mizoram state a nih aṭanga tun hun thlengin, hriat theih chinah Mizoram treasury hi sum harsatna avangin kum 1998 (March, April, May leh June-ahte) khan khâr (stoppage/ suspension of payment from (RBI) a ni tawh," an ti.

Finance department chuan Mizoram sorkar treasury khâr a nih hun zawhna chu, "Khâr a nih hun chhung erawh chu record hmuh mai tur a awm loh avangin hriat theih a ni lo," tiin an chháng.

Hetih lai hian, November 21, 2022-a Mizo Hnam Rûna MNF party inkhawmah MNF vice president Lalthlengliana chuan, Congress sorkar laiin sorkar treasury vawi 30 chuang khâr a nih thu a sawi.

MNF party thu-chhuah tarlan danin, Lalthlengliana chuan, "Tun hnaiah Congress hoin an ngûm khâk hmu loin sum harsatna chungchangah min bei a. An hun lai khan sorkarin sum a neih loh avangin treasury vawi 30 chuang an khâr," a ti.

"Sum an harsat avangin kum 2012-2015 chhung khan RBI aṭangin cheng vbc. 1331.61 lai an pûk... Pu Zoramthanga tluka finance enkawl thiam Mizoramah an la awm lo. MNF sorkar hmasa chhung khan treasury khâr a awm ve lo," a ti bawk.

Finance department chuan, August 1, 2022 hnuah Mizoramin centrally sponsored scheme (CSS) sum a hmuhte chu a hmangtu tur department/agency hnena pek chhuah hun bithliaha pek chhuah hman loh a awm loh thu an tarlang a, "CSS sumte hi ni 21 chhunga pek tur tih a ni a, a theih chin chinah chuan zawm kan tum a ni," an ti.

Tun dinhmunah Finance department-in CSS sum kawl mek a neih leh neih loh zawhna chu, "Finance department hian RBI kaltlanga CSS sum leh thil dang kan dawnte hi kan record a. Amaherawhchu, sum kan dawnahte hian a sanction order leh scheme detail a awm lo. Sum hi ni tin lut leh chhuak tam tak a awm avangin CSS sum kawl mek zat hriat a harsa hle," tiin an chháng a; financial management information system ṭha zawk an neih hunah CSS sum kawl mek zat hriat theih a nih tur thu an tarlang.

Finance department hian CSS sumte a hun taka pek chhuah a nih loh chánga pek chhuah loh chhan awm theite an tarlang a; chu'ngte chu - department aṭanga process flow a muan vang te, revenue expenditure atan hmanhmawh taka sum lo hman tur a awm avanga sum indaih lohna a awm cháng te, financial year tawpa sum indaih lohna vanga K Deposit-a sum dah a nih vangte a ni.