MADC CEM hoin Beichhua an hmuak; Tu mah ka dem lo - Dr K Beichhua

Siaha bialtu MLA Dr K Beichhua chu minister of state aṭanga bàntir a nih hnua a vawi khatna atan January 14, Inrinni khan Siahaah a haw a, Siaha district chinah Mara Autonomous District Council (MADC) chief executive member (CEM) M Laikaw hoin mipuiin an lo hmuak.

Dr K Beichhua puala Siaha Bazar traffic point bula hmuahna inkhawm­ah K Beichhua chuan, minister of state aṭanga bàntir a nih chung­changah tu mah a dem loh thu sawiin, "Kan district-in politics-a hun khirh a tawh mek hi hun hlui aṭanga hun thar, kawng hlui aṭanga kawng thara min hruaitu tur a ni. Hma lama hun ṭha lo inher chhuak tur beiseina nen kan thlir mek a ni," a ti.

Siaha Bialtu MLA chuan, Mizoram tana thil ṭha turah chuan tlâk ngam politics an khelh a hun tawh tih sawiin, "Ram tan chuan political party bik ti loin ke pênho zel tur kan ni," a ti a; party bik ti lo a, political party zawng zawngte'n lungrual taka amah an lo hmuak chu ropui a tih thu leh an chhungkaw tan an dam chhunga an theihnghilh tawh loh tur a nih thu a sawi.

Kum li chhung minister of state a nih chhungin Pathianin Siaha district-ah thil ropui tam tak a tihsak thu sawiin K Beichhua chuan, "Hun thar lo inher chhuak turah pawh hmasawnna hna tam tak min la thawhsak zel dawn a ni," a ti.

Dr K Beichhua hmuahna hun hi MADC executive member S Lalremthanga'n a kaihruai a, MADC chairman N Viakhu chuan lawmthu sawina hun a hmang a ni.

Dr K Beichhua hi Lawngtlaiah pawh Lawngtlai District MNF President leh a thawhpuite bakah, LADC hotu ṭhenkhatten an lo hmuak a ni.