KHAWTHLIR

KTP-in thisen pe
KṬP, Ramthar Veng Pastor Bial chuan January 14, Inrinni khan Zoram Medical College blood bank tan thisen unit 50 an pe a, petute mipa 42 leh hmeichhia pariat an ni.

Heroin man
Vaivakawn police-te chuan January 14, Inrinni chawhnu khan Bawngkawnah lirthei pakhat aṭangin heroin gram 501 (hawng 40) an man a, international market-ah cheng nuai 250 chuang man a ni. Ruihhlo neitua puh mi pahnih - lirthei khalhtu ZD Lalchhuanawma (38) leh R Lalhmachhuani (50), Lunglei Electric Veng ve ve nia inchhálte an man bawk.

Kawng khâr a ni dawn
Venghnuai tawntirh pengṭhuam aṭanga Venghnuai Field inkar kawngpui chu PWD-in an siamṭha mek a, hei vang hian hna thawh hun chhung, chawhma dar 10 aṭanga tlai dar 4 thleng kawngpui khâr ṭhin a ni. Kawngpui hi vawiin leh naktukah pawh siam chhunzawm a ni ang.

Rângva hlan
AMC Ward XVI bialtu corporator R Lalawmpuii chuan January 14, Inrinni khan a bial chhunga Bethlehem Veng MUP unit hnenah MUP Rûn chung tur rangva bundle 4 a hlàn. R Lalawmpuii chuan, upate tawnhriat leh finnate chu khawtlang leh hnam tan a hlut thu sawiin, thâ leh zung an ngah tawh loh avangin an inawm hlimna tihphuisuisak a rilruah a len thu a sawi.

Hriattir turin  Police-in ngen
Mizoram Police chuan thuchhuah siamin, national highway kama leivûng leh bawlhhlawh paih chíng an awm ṭhin tih tarlangin, chutiang thil ti hmute chu police-a hriattir zel turin an chah. Police thuchhuah chuan, "Dan phal loh a nih bakah, accident a thlen palhte a hlauhawm ṭhin. Dan phal loh ti lo turin mipui kan ngen a, kan veivahnaah hetiang dan bawhchhia leh vantlang himna tiderthâwng thei kan hmu a nih chuan police-ah report vat zel turin kan inngen e," an ti a; dan anga hrem zel an nih tur thu an tarlang bawk.