YMA member tan nupui/pasal thlan thiam a pawimawh - Lalrinawma

YMA, Sesawng Branch chuan January 14, Inrinni khan an khaw community hall-ah an branch YMA kum 50-na, golden jubilee an lawm a; khuallian Social Welfare minister Lalrinawma chuan, YMA member tan hnam dang nupui/pasal neih chungchangah thlan thiam a pawimawh thu a sawi.

Lalrinawma chuan, YMA member-te chu mahni hnam nunphung leh ziarángte zahpui loa chawi nung zel turin a sáwm a, "Hnam dang nupui pasal neih chungchangah YMA member kan nihna angin thlan thiam a pawimawh. Ram leh hnam humhalh kawngah theihtawp chhuah zel a pawimawh. Fa neih tam chungchang pawh inzirtir thar leh a ṭul," a ti.

YMA member-te chu ruih theih thila fihlim tur leh mahni hmun ṭheuhah ruihhlo do tura fuihin Minister chuan, "Nun uluk loh hian kan hma lam hun thui tak a tichhe thei. Kan ram leh hnamin lei rem a rah theih nan ram tana nunna chán tate i hre reng ang u," a ti a; hnam himna leh enkawlnaah mi tinin mawh an phurh thu a sawi.

Lalrinawma chuan, YMA chu pawl ṭangkai, ṭanpui ngaite ṭanpuitu leh khawtlanga chhiatní leh ṭhatnía mite belh ber a nih thu sawiin, "YMA hi Mizo nun ze mawi leh hnam ziaráng chawi nungtu a ni," a ti. Minister hian golden jubilee lungphun leh golden jubilee building ahawng bawk.

Sesawng YMA golden jubilee lawmna hi an president Lalramchuana Ralte-in a kaihruai a, Sesawng Branch YMA hruaitu hlui Ramherliana'n jubilee souvenir a tlangzarh a ni.