Covid-19 do nan hlawh thawh dawn Chief minister-in 60%, minister-te 50%

MNF Legislature Party (MLP) secretary L Thang­mawia chuan, Covid-19 dona atan kumin May aṭanga Decem­ber thlengin an hlawh aṭangin pawisa an thawh dawn a, Chief Minister-in hlawh aṭanga 60% leh Speaker, minister te, Deputy Speaker leh Deputy Chief Whip-ten 50% an thawh dawn thu a sawi.

L Thangmawia hian nimin khan a pisaah thuthar theh­darhtute a kâwm a; Speaker hoin MNF, ZPM leh BJP MLA-te'n Covid-19 dona atan kumin May-December chhung hlawh aṭangin 30% leh MLA fund cheng nuai 50 an rèl tawh thu sawiin, "Chief Minister, Speaker, minister, Dy. Speaker leh Dy. Chief Whip-te'n hma hruai tura an inngaih avangin percentage tam zawk thawh an inhuam a ni," a ti.

MLP Secretary chuan, Assembly Speaker hoa an rèl tawh, an hlawh bakah Chief Minister-in Rs. 20,000 leh Speaker, minister, Dy. Speaker leh Dy. Chief Whip-ten May-December chhung thla tin Rs. 15,000 an thawh dawn bawk a ni.

Rin lâwk lohin hripui a lèn thu sawiin L Thangmawia chuan, "Min barakhaih tak zet a, kan ri rum rum a ni. NGO leh official-te inpekna a ropui khawp mai. Finance lam a nghawng dawna a lan takah ngaihtuahna sèn a ni. MNF chuan kan hlawh thawh kan inhuam a, mahse, Chief Minister leh Speaker-in party bil anga kal hun a ni lo an tih avangin Speaker hoin party hrang hrang MLA-te kan ṭhukhawm a ni," a ti. 

MLP Secretary chuan, Speaker hoa meeting a nih hnuah MLA-te'n an hlawh aṭangin Covid-19 dona atan an thawh thu sawiin, "Mi tam takin CM Relief Fund-ah pawisa an chhûng a, a thawh kher lote pawhin ṭanpuina an pe chhuak. Chuvangin, MLA-te pawhin theihtawp kan chhuah ve leh a ṭul," a ti a, Speaker hoin party hrang hrang MLA-te chu May 4 & 7-ah an inhmuh khawm thu a sawi.

L Thangmawia chuan, May 4-a inhmuhkhawmnaah hian party tinte chu an inhuam vek thu sawiin, "Party-te ṭheuh inràwn khawm leh ni se tih a ni. Chutiang a nih lai chuan Congress Legislature Party (CLP) lamin party mal inhuam anga ngaih theih turin thil an ti a, MLA-te inthurual lo anga lang thei lek lek turin," a ti.

May 7-ah an ṭhutkhawm leh thu sawiin Thangmawia chuan, "MNF, ZPM leh BJP aiawhte kan tel a, CLP aṭangin an tel lo, an hman remchan loh vang a ni a, ka hriatpui. MLA-te chu mipui hmaa pên tur kan ni tiin, Covid-19 dona atan kan hlawh leh fund thawh kan remti tlang a ni," a ti a; hlawh thawh chu inrèlsak ngawt chi a nih loh avangin CLP-te chuan an duh dana an rêl tura an ngaih thu a sawi.

MLP Secretary chuan, Speaker báng tura nawrnate a awm thu sawiin, "Speaker báng tura nawr hi Mizoramah a vawi khatna niin ka hria. MLA-te hi Speaker vangin lung­rual taka kal thei kan ni. Ṭan rual ṭha titu ber zawk a ni. Speaker an puhna hi thu belhchian dâwl lo a ni. Covid-19 do kawngah CM leh Health Minister hmalakna leh kan inpek tlânna avang­in ti ṭha pawl ber state kan niin ka hria," a ti.

Aizawl South-III bialtu MLA Prof. F Lalnunmawia chuan, CM Relief Fund hman dan ringhlel an awm chu pawi a tih thu sawiin, "Theihtawp kan chhuah tlan laia hetianga ngaihdan nei an awm hi a hrehawm duh. Thi leh dam kara kan lèn lai hian tu mahin an ti­chingpen duhin ka ring lo," a ti a; tun ang boruakah sawisel tur zawn lutuk ṭhaa a hriat loh thu a sawi.

.    CM leh Speaker-in party mal anga kal ṭha an tih loh vangin Speaker hoin MLA-te kan ṭhukhawm.

.    Party tin MLA-te'n Covid-19 dona atan thawh kan inhuam vek, Congress lamin anmahni chauh huam ang deuhin thil an ti.

.    Speaker an puhna hi thu belhchian dâwl lo a ni.

.    Covid-19 do kawnga state ti ṭha ber pawl kan niin ka hria.