Mizorama adhoc aided school-te dinhmun sang zawka dah turin ngen

Mizoram Govt Adhoc Aided School Teachers Union (MIGASTU) chuan thuchhuah siamin, ad hoc aided school-te chu tuna Mizoram sorkar hun kal mek chhung ngeia dinhmun ṭha zawkah dah a, sorkar sikula dah (provincialise) turin sorkar thuneitute an ngen.

January 14, Inrinnia MIGASTU thuchhuah chuan, "Kan dinhmunte min hre chianga min khawngaih ṭhintu chief minister Pu Zoramthanga leh Education minister Pu Lalchhandama Ralte kaihhruai sorkar hian tun sorkar chhung ngei hian ad hoc aided school-te hi min upgrade/provincialise thuai turin kan ngen tak meuh meuh a ni," tiin a tarlang.

Sorkar tan sum sên belh vak ngai loa dinhmun sang zawka dah mai theih an nih thu sawiin MIGASTU chuan, "Chutiang tur chuan Provincialisation Rules nei sa thlap kan ni. Tuna sorkar hotute ngei pawh hian general election dawnah khan min upgrade ngei an tum thu nasa taka an sawite pawh kan bengah a la chám reng a ni," an ti.

MIGASTU chuan, sorkar puihna dawng ṭhin ad hoc aided school-a thawkte chu kum 30 dáwn thawk tawh an nih thu leh zirtirtu zingah sorkara a ngheta thawk (regular) ni lo zingah chuan an senior fâl thu leh, mi eng emaw zat chu sorkar aṭanga hamṭhatna dawng loa an pension mek thu an sawi a; an dinhmun a chhia a, an khawngaihthlak tak zet thu an sawi bawk.

Zoramthanga kaihhruai sorkarin danglamna ropui tak a nei nia sawiin, "Mipui phurrit chhâwk zângkhaina pawimawh tak a nihziate leh zirtirtute pawh hamṭhatna ṭha zawk an neih theihna a nihzia hriatsakin vantlang sikulte tan school upgradation a kalpui ṭhin hi a ni," an ti a; chhungkaw sang tam takin hamṭhatna nasa tak an dawn phah thu te, sikul upgrade hmabak eng emaw zat an awm thute an tarlang.