Tanhril, Aizawla FCI kudamah Buhfai quintal 20,310 a awm

Land Revenue & Settlement minister Lalruatkima chuan January 14, Inrinni khan Tanhrila Food Corporation of India (FCI) kudamah FCI Foundation Day vawi 59-na lawmna a hmanpui. He hunah hian Tanhrila FCI kudamah buhfai ip 41,211, quintal 20,310 a awm mek thu tarlan a ni.

Lalruatkima chuan, FCI chu India ram buhzém enkawltu a nih thu sawiin, "Khawzawla FCI kudam metric ton 3,000 leng tur leh Sairanga FCI kudam metric ton 10,000 leng tur sak turah pawh LRS department lam chuan tih tur kan kuta tla kan tifel vek tawh," a ti a; Mizoramin fûr laia buhfai khamkhawp a hmuh reng theih nan kudam sak turte chu an ṭangkai dawn thu a sawi.

Minister chuan, khua a ṭhâl leh tawh avangin kângmei lakah fimkhur a ṭul chhoh thu te, tih tur leh tih loh tur inhrilh thar mawlh mawlh a ṭul thu leh, sorkar thuchhuahte zawm ṭhat a pawimawh thute a sawi bawk.

Aizawla FCI Divisional Office-a hotu Zodinpuii Ralte tarlan danin, Antyodaya Anna Yojana (AAY) leh Primary House Hold (PHH) chhungkuate tan sorkar laipuiin kumin 2023 chhungin a thlàwnin buhfai a sem dawn a, tunah hian retailer-te'n an sem ṭan tawh. A thlawna buhfai sem hi a ṭul anga pawhsei tura tih a ni bawk. Buhfai sem mek grade A chu fortified rice-a thlak vek tura ruahman a ni.

Sorkar thuchhuah tarlan danin, fortified rice chu mihring ei atan a hlauhawm lo a, mithiamte'n uluk taka an buatsaih a nih bakah, iron, folic acid leh vitamin B-12 a tel avangin mihring tan a ṭha hle zawka ngaih a ni. Mizoramin buhfai a dawn, FCI kudama thleng tharte chu kum 2022-23 crop year-a tharte a ni.

FCI hian Mizoramah food storage depot (FSD) paruk a nei a, Sairang leh Khawzawlah kudam sak zawh thuai beisei a ni.