IPR leh MJA-in inhlan tharna hun hmang

Information & Public Relations (IPR) department leh Mizoram Journalist Association (MJA)-te chuan nimin khan IPR Auditorium-ah kum 2020 atana inhlan tharna hun an buatsaih a, IPR department mi leh sate leh MJA member ṭhahnem tak telin, IPR minister Lalruatkima'n a hmanpui.

Minister Lalruatkima chuan, IPR leh MJA chu thawkho an nih angin an inpawh tlân a pawimawh thu sawiin, "Sorkarin chanchinbumite rawngbawlna pawimawhzia a hria a, a duhsak hle. Press study tour leh training buatsaihte chhunzawm hi sorkar chuan a ngai pawimawh a ni," a ti.

Lalruatkima chuan, "MJA-te hamṭhatna tura ruahmanna Mizoram Journalists Contri­butary Pension Scheme, advertisement rate thar leh Press Enclave-te a hlawhtlin thuai theihna turin sorkarin chak takin hma a la mek a ni," a ti a; sorkarin mipui tana hriat tur pawimawh leh hamṭhatna a duante sorkar press release kaltlanga chhuah ṭhinte chu uar zawka chhuahsak ṭhin turin press mite a sáwm.

IPR Minister chuan, social media kaltlanga thu thehdarh a awlsam avangin chanchinbumite chu thu chiang leh belhchian dâwl zawk mipui hnena puanzar kawngah ṭan la turin a fuih. MJA president Zonunsanga Khiangte pawhin thu sawiin, sorkarin chanchinbumite hma­sawnna leh hamṭhatna tura hma a lakna zawng zawngah an lawm thu a sawi a, "Chanchinbumite intahhriamna tura study tour te, training leh workshop buatsaihte hi a hlâwk em avangin sorkar hian chhunzawm zel se kan duh," a ti. 

Zonunsanga Khiang­te chuan, sorkar policy puanzar leh sorkar hnathawhte mipui hriattir kawngah theihtawp an chhuah ṭhin thu a sawi a; sorkar hmalakna zirchianna leh mipui tihbengvarna atana project site visit pawh sorkar lamin rem a tih phawt chuan chanchinbumite an inpeih reng thu a sawi bawk.

IPR director Lallianpuii chuan, IPR leh press mite hnathawhin a tum - hmasawnna kawnga mipui rilru sûkthlêk siam dik te, thu dik puan chhuah te, zirtirna pek leh mipui mar dehte chu thil awlái a ni lo tih a sawi a, "Fimkhur renga thawh ngai, inzir reng ngai leh ni tina intah hriam ngai a nih avangin inthlahdah leh tih dik loh palh a thiang ve lo," a ti.

Inkhawmah hian kum 2019 chhunga MJA member thi mi panga -  MJA vice president R Lalhmangaihzuala (Romei editor), Thuthar editor A Ro­dingliana, ZONET news editor Laldingliana Sailo, Zoram Tlangau news editor Richard Lallawm­zuala leh Rihlipui (Champhai) editor DK Lalhruaitluanga te sûnna hun hman a ni.