Tamil Nadu leh Puducherry aṭangin Tangkhangte an rawn haw thleng

Covid-19 hripui léng leh inkhârkhip vanga Tamil Nadu state leh Puducherry union territory-a Mizo tangkhang mi 884 chuang chuan nimin khan Chennai Mizo Welfare Association (CMWA) leh sorkar hmalaknain rélin Bairabi an thleng a; uluk taka endik vek niin, an awmna district ṭheuhah hruai nghal an ni.

CMWA hruaitute'n an ngen angin sorkar laipuiin rèl chuan man a tumsak (85%) bak 15% chu Tamil Nadu sorkarin a tumsak a; Bairabi thleng rél a tlan theih nan CMWA hruaitute'n Railways hotute an dawr a, hma an la a ni. Tangkhangte hian nimin chawhma dar 11:15 khan Bairabi rél chawlhhmun an thleng a, Kolasib DC Dr H Lalthlangliana hoin medical team-te leh sorkar official dangte'n an lo hmuak.

Nimina rawn hawte hi Chennai, Vellore leh Puducherry-a mite niin, an vaiin mi 884 an ni a; Aizawl district mi 346, Lunglei dis­trict mi 50, Champhai district mi 69, Serchhip district mi 34, Kolasib district mi 44, Siaha district mi 136, Lawngtlai district mi 46, Mamit district mi 82, Saitual district mi 37, Khawzawl district mi 20 leh Hnahthial district mi 20 an ni.

District hlat dan indawtin rél aṭangin an chhuktir a, khawsik enna (infrared thermometer) hmanga endik an ni. Chennai-a Covid-19 kái tamna (red zone)-a awm mi 54 erawh chu Rapid Antibody Test (RAT) hmanga endik an ni a, mi pakhat bak rinhlelhawm (RAT reactive) an awm lo. Doctor-te hnen aṭanga RAT reactive ah hian chi hnih IgM leh IgG a awm a, nimina RAT reactive hi a hlauhthawn awm loh zawk, IgG a ni.

Khawsik enna hmanga endik an nih hnuah Mizoram sorkarin lirthei a rua­hman hmangin an awmna tur district-ah ṭheuh panpui an ni. Bairabi aṭanga an district headquarters ṭheuh panna turin Mizoram sorkar chuan bus 53 a ruahman a; Aizawl district tan bus 21, Saiha district tan pasarih, Champhai leh Mamit district tan panga ve ve, Lunglei, Kolasib leh Lawngtlai district tan pathum ṭheuh, Serchhip leh Saitual district tan pahnih ve ve, Khawzawl leh Hnahthial district tan pakhat ve ve ruahman a ni.

District hnai deuha mite chuan nizan khan an district headquarters an thleng a, an district ṭheuhah RAT hmanga endik leh an nih hnuah sorkarin dah hranna tura a ruahman quarantine centre-ah dah an ni. Hetih lai hian, kohhran eng emaw zat chuan an hall-te quarantine centre atan hman an remti a, nimina rawn haw tharte zinga ṭhenkhat chu kohhran hall-ah dah an ni.