Taxation dept. target tihsan a ni; Contractor chhiah pe lote an chhui mek

Sorkar kum 2022-23 chhunga Taxation department-in chhiah a hmuh zat tur bituk (target) chu budget revised estimate (RE)-ah tihsan a ni. Chhiah hmuh zat tur tihsan ni mah se, an khûm theih tho an inbeisei thu commissioner of state tax Kailiana Ralte chuan a sawi. Taxation hian contractor chhiah pe lote an chhui mek a ni.

Vanglaini palai zawhna chhangin Kailiana Ralte chuan, kum 2022-23 chhunga sorkarin target a tuk chu cheng vbc. 730 a nih thu a sawi a, "Revised estimate-ah cheng vbc. 900-ah tihsan kan ni. Theihtawp kan chhuah zel ang a, kan target hi kan khûm theih tho kan inbeisei," a ti.

Taxation department hian December 2022 thleng khan chhiah cheng vbc. 717.74 an hmu tawh a; sorkar kum kal mek chhunga an hmuh tam ber thla May, 2022-ah cheng vbc. 93.46 an hmu a ni.

Kailiana Ralte chuan, contractor-te'n chhiah an pek tur an pek ngei theih nan hma an lâk thu a sawi a, "Investigation Cell kan din a, contractor chhiah an pek tur ang pe lote chhui chian mek a ni. Hmuh chhuah tawh ṭhenkhatte chu bawhzui turin an zone lamte hriattir an ni tawh," a ti.

Commissioner of State Tax sawi danin, contractor-te'n hna thawhna tur sum ruahman (estimate) aṭanga chhûta 12% chu chhiahah an pe tur a ni. Bill an lâk dawnin 2% lak ṭhen phawt a ni a, 10% chu bill an lak hnuah anmahni'n an pe tur a ni thung. Contractor eng emawzat chuan 10% an pe lo a, chu'ng mite chu chhui mek a ni.