Inthlan leh turah party dangte aiin advantage kan nei ṭha zawk - MNF President

MNF president Zoramthanga, chief minister ni bawk chuan, SEDP an sem dawn avangin kumina MLA inthlanpuiah MNF-chu party dangte aiin tling leh turin an dinhmun a ṭha zawk niin a sawi a; inthlan dawnah chuan chhungkaw nuai khatin SEDP ṭanpuina an dawn hman a beisei thu a sawi bawk.

Zoramthanga hian nimina Aizawla Mizo Hnam Runa inkhawmah thu sawiin, sorkar leh an inrin chhan a sawi a, "MNF aia MLA nei tam an awm kan ring lo. Tunah hian hmun thuma ṭhena hmun hnih MLA ṭha tak tak kan nei a, anni làn thei tur an awm lo. Kan MLA-ten bial an enkawl ngat ngat a, development scheme lo kal tur leh SEDP nen party dangte aiin advantage kan nei ṭha zawk," a ti.

MNF President chuan, "Financial year tharah chuan SEDP thar nen, a dawng tawhte bakah inthlan dawnah meuh chuan chhungkaw nuai khatin an dawn hman ka beisei," a ti a; inthlanpui awm leh turah MNF dinhmun a ṭhat ber thu a sawi.

Pathian ṭanpuinain sorkar an siam leh ngei a rin thu sawiin Zoramthanga chuan, "Inthlana tling ngei turin i bei ang u,” a ti a; Pathian malsawm tlâka theihtawp chhuah turin MNF party mite a chah a ni.

MNF president Zoramthanga chuan, sorkar chu phurritin a delh ṭhin thu sawiin, sorkar laipui nena inzawmna nei te, Assam border te, Burma aṭanga kuhva, drug, refugee leh smuggling nen, party chhung inrêlbàwlna bakah sorkar sum leh pai indaih lohna avanga harsatna tinrengin a hlâwma a tlâkbuak cháng chuan, 'Lalpa rit ka ti hle mai' tia a ṭawngṭai ṭhin thu a sawi.

CM Zoramthanga hian sum enkawl thiam loa puhna leh sorkarin hlawh an lâk tlai ṭhin a sawifiah a, "A cháng chuan kan loan lâkte chu thla tìrah voice record hmangin min rawn ṭhíng ṭhin," a ti.

MNF President chuan ZPM chu beih an ngai lo a, anmahni leh anmahni an inbei nasa niin a sawi a, "Kum 2018-a an boruak ang kha a ni tawh lo. Unit system kan duh lo, kohhran hi kan unit an ti a, chief ministerial candidate an neite kha ngaihzawng neih hma hawta fa hming sa lâwk ang a ni," a ti a; kum 2018 inthlan laia an dinhmun ang kha an ni tawh lo niin a sawi a ni.