Inthlan hi thatchhiat inzirtir páwlte leh taimâk inzirtir páwlte indona a ni dawn - ZPM Working President

ZPM working president K Sapdanga chuan, ZPM thupui ber chu kalphung thar, mipui sorkar din a ni tih sawiin, kumina Mizoram inthlanpui neih tur chu thatchhiat inzirtir zel pawlte leh taimâk inzirtir pawlte indona a nih dawn thu a sawi.

K Sapdanga hian nimina ZPM pisaa chhung inkhawmah thu sawiin, "Kan hma lawka inthlan lo awm tur hi corruption hi la hluar zel rawh se ti leh corruption hi ûm tawm ni rawh se ti pawl, kan ram hi chhe zel mahse pawi ti lêm lote leh kan ram hi ṭha ve tawh rawh se ti pawlte, thatchhiat inzirtir zel pawl leh taimâk inzirtir pawlte indona a ni dawn a ni," a ti.

ZPM Working President chuan, "Politics inṭhial mekah hian party lian pahnihte an kal ngaiin an kal ang a, keini ZPM party chu kalphung tharin kan kal thung dawn," a ti a; sum tam tak séng chung pawha kum khat daih kawng takngial sorkarin an siam hlei thei lo chu pawi a tih thu a sawi.

ZPM working president Sapdanga chuan, kalphung thar, mipui sorkar din chu kan thupui ber a ni tih sawiin, "ZPM anga inthlanpui vawi hnihna hmachhawn turin kan inbuatsaih mek. A ṭum khatnaah kha chuan pawl ding thar kan nih avangin thil fel tâwk lo tam tak a awm a, party pawhin hmasawn zelin, kalphung thar mipui sorkar din turin nasa lehzualin kan inbuatsaih mek a ni," a ti.

K Sapdanga chuan, ram puma campaign beihpui thlâk tumin an inbuatsaih mek tih sawiin, "Mizoram mipuite'n ZPM hi inthlan awm turah hian an thawk rim ber a ni tih hi min hriat dan a ni tur a ni. Kan leader Pu Lalduhoma pawhin ‘Kan party zingah hian kei hi a thawk rim ber ka ni tur a ni’ tiin a lo sawi tawh. Zoram mipuite'n kan thawhrimna an hmuh a ngai a ni," a ti a; "Kan campaign-na leh lamṭang kan zawnnaah kut tlingin, Pathian duh zawngin hma i la ang u," tiin an party mite a sáwm.

ZPM inkhawm hi an secretary general PC Vanlalruata'n a kaihruai a, Rev. C Sangliana'n hunserh a hmang a ni.