Fimkhur a ṭul ber hun a thleng mek - Health Minister

Health & Family Welfare minister Dr R Lalthangliana chuan, tun hnaiah state páwn aṭangin Mizoramah mi sing chuang an rawn haw dawn thu leh Mizoramah Covid-19 hripui a darh loh nan fimkhur a ṭul ber hun a thlen mek thu a sawi.

Health Minister hian nimin khan Lunglei leh Hnahthial a tlawh a, sorkar official hotute nen an inkawmnaah thu sawiin, "Covid-19 Mizorama a darh loh nan tun hi fimkhur ṭul hun lai a ni. Mizoram mi leh sa state páwna tangkhang mi sing chuang hmun hrang hrang aṭangin an rawn haw belh zel dawn a, in­thlahdah loin mi tin kan fimkhur zual sauh a ṭul dawn a ni," a ti.

Dr R Lalthangliana chuan, tun din­hmunah State Referral Hospital ICU-ah khum pasarih a awm thu sawiin, "Covid-19 hri a darh vaih chuan ram pumin kan buai hle dawn a ni," a ti a; Mizoramin hriselna lama inenkawlnaah hmanrua a neih ṭhat tâwk loh avangin invênna lamah theihtawp chhuah a ṭul thu a sawi.

Mizoramah hripui vei awm tawh rih lo mah se, thlamuan sual a hlauhawm thu sawiin Minister chuan, "Kan fimkhur loh chuan sorkar leh NGO te, task force bakah mipuite'n hah tak leh rim taka hun eng emaw chen kan lo beih ve ṭâng ṭãngna hi zan khat thil thuah kan ti chhe vek thei a ni," a ti a; sorkarin tih tur leh tih loh tur a tihte chu ṭha taka zâwm turin mipui a chah.

Dr R Lalthangliana chuan, sorkar hotute kaihhruaina hnuaiah Mizoram chu India ram state zingah Covid-19 chungchanga inbuatsaih hmasa berte zinga mi a nih thu sawiin, "Hma hruaitute zinga mi kan ni. Lockdown pawh central aia ni thuma hmaa puangin, domestic flight phei chu a khâr hmasa ber kan ni," a ti a; Covid-19 donaa mawhphurhna hrang hrang chelhtu te, ṭanpuina thawhtute leh hmanrua siamtute chungah lawmthu a sawi a ni.

Health Minister chuan, Lunglei district leh Hnahthial district chu international boundary nei an nih avangin inthlahdah thei an nih loh thu a sawi a, "Aizawl an pan zel a ngaih loh nan Lunglei district-ah healthcare infrastructure tihchangtlun mek zel a ni a, trauma centre pawh buatsaih mek niin, ICU khumte pawh dah belh tum 

a ni," a ti.