Inthlan senso tam hi corruption bul inṭanna a nih avangin kan do - Lalsawta

Mizoram Pradesh Congress Committee (MPCC) president Lalsawta chuan, party dangte'n inthlana chak nan sum hman an tum dawn nia sawiin, Congress party erawh chuan inthlan senso tam chu eirukna bul inṭanna a nih avangin inthlana sum hman tam an do niin a sawi.

Lalsawta hian nimin khan Lungleia Congress Bhavan kum 2023 atan a hawng a; thu sawiin, "Party dangte'n an sum ngah inthlana chak nan hman an tum dawn a, keini erawh chuan inthlan senso tam hi corruption bul inṭanna leh a tihluartu nia kan ngaih avangin inthlana sum hman tam hi kan do a ni. Ram din chhuah duh, Mizoram mipui nena kan thawhho chuan kan hneh ngei pawh kan inring," a ti.

Congress party President chuan, "Pawisa chakna hmanga rorelna chan tumte hi eng mah ti thei loa siam kan tum a, pawisa chakna thah hi Congress thuthlung thar a ni," a ti a; party dangte anga sum tam tak hmanga campaign an tum loh avangin an party mipui, block, group leh unit-te chu Congress party candidate-te phurrit siam zawng ni lo, hek zawk tur pawha lo ṭanpui zawk turin a chah.

MPCC president Lalsawta chuan, ram siamṭhat duh mi ṭha tak takin ni tin Congress party an zawm thar nia sawiin, kumina MLA inthlanpuiah Lunglei district-a MLA bial pasarih lâk vek theih an inrin thu a sawi a, "Tun anga ṭanrual leh thuawih taka kan thawhho ṭhat zel chuan chiang lehzualin chakna kan chang ngei ang. Ram siamṭhat hmanhmawhthlakzia hria ila, kan ram tan chauh politics dik khel ila, tu mahin politician kan khel ve tur a ni lo," a ti.

Lunglei Municipal Council (LMC) chungchang sawiin Lalsawta chuan, "LMC inthlan hi kum 2023 MLA inthlan atana semi-final a ni a, Lunglei mipui tan inenkawlna ṭha leh fel nei turin Congress party-in rorelna a chelh a ngai," a ti a; LMC inthlan turah Congress party an phûr thu a sawi.

Lungleia Congress Bhavan hawnna inkhawm hi LDCC treasurer Laltlankima'n a kaihruai a; MPCC general secretary Joseph Lalhimpuia pawhin thu a sawi a ni.