Lirthei chesualah mi 3 thi, 2 hliam; Thi zingah CADC MDC pahnih an tel

Nimin zing khawvar hma, dar 4 vel khan Chawngte aṭanga Aizawl rawn pan lirthei (Gypsy) MZ-01 F-0805 chu Melthum daiah chesualin, kawng thlangah a lum a, mi pathum thiin, mi dang pahnih an hliam a, thi zinga pahnih chu Chakma Autonomous District Council (CADC)-a member of district council (MDC) ni lai an ni.

Thu dawn danin, lirtheiah hian mi panga an chuang a, metre 60 vel a lum a, a kâng zui a ni. A hmunah mi pathum - Mahesh Baron Chakma, Charan Singh Chakma leh Bana Chandra Tongchongya te an thi a; Mahesh Baron Chakma leh Charan Singh Chakma te hi CADC MDC an ni.

Mi dang pahnih - Lakhan Chakma leh Dilip Kumar Chakma te an hliam a; lirthei neitu leh khalhtu Lakhan Chakma hi CADC MDC a ni a, DK Chakma hi Jaruldubsora MNF unit president a ni. Hliamte hi kawngpuiah an vâk chhuak a, Trinity Hospital-ah enkawl an ni a, ngaihtuahawm an ni lo.

Mitthite leh hliamte hi Melthum Branch YMA-in an buaipui bakah, mitthite chu kuang an tumsak a; mitthite chu Melthum Vantlang Inah lak niin, Kulikawn Police Station-in dan anga tihfel ngaite an buaipui a, chumi hnuah State Referral Hospital-ah endik a ni a, nimin vêk khan Chawngte-ah lâk an ni.