KHAWTHLIR

2nd IR Battalion din champha lawm
Mizo Indian Reserved Police 2nd Battalion, Khawzawl chuan nimin khan Khawzawla an hmunpuiah an din champha vawi 22-na an lawm a, commandant hmasa ber LT Hrangchal, MPS khuallian a ni. 2nd IR hi January 15, 2001-ah din a ni a, kum 2006-2008 chhung khan Chhatisgarh-ah Naxalite helte bei turin tirh an ni a, an zinga mi 10 chu naxals helho bomb kam puakah an thi a ni. 2nd IR-te hi commandant Ruatsanga Ralte-in a ho mek a ni.

Heroin man
Assam Rifles leh Excise & Narcotics department ṭang dun chuan January 15, Pathianni khan Champhai Zote huam chhungah heroin no. 4 gram 25.9 an man a; a neitua puh Lalthlamuana, Champhai Zote an man bawk. Heroin an man hi Rs 12,95,000 hû a ni.

Kângmei auhla
Lunglei DC pisa chuan kângmei laka mipui fimkhur nan kângmei vên pawimawhna tilang thei auhla (slogan) inziahsiak an buatsaih dawn. Auhla hi Mizo ṭawnga ziah tur a ni a, thumal 20 aia tam lo tur a ni. Mi pakhatin slogan pakhat aia tam thehluh theih a ni lo a, February 10, 2023 thleng thehluh theih a ni.

Startup Day lawm
Planning & Programme Implementation depart-ment hnuaia Mizoram Startup Mission chuan nimin khan Dawrpui Multipurpose Hall-ah National Startup Day Mizoram Edition lawmna hun an buatsaih a, Planning secretary Lalmalsawma Pachuau-in a hmanpui.

Hnahthiala in rawktua puh man
Nikum December thlaa Hnahthiala in pahnih rawktu nia hriat Lalrinmawia (24) s/o Lalhmingliana, Hnahthial Venglai chu January 15, 2023 khan police-in an man. Police tarlan danin, December 24, 2022 khan Hnahthial Electric Venga in pakhat chu rawk niin, Rs 10,000 rûk a ni a, December 26 khan Hnahthial Model Venga in pakhat pawh tukverh tichhiaa rawk leh niin, Rs 1,00,000 rûk a ni. Police-te'n an chhui zui a, in pahnih rawknaa inhnamhnawih ni ngeia hriat Lalrinmawia chu an man ta a ni. Lalrinmawia hian ruihhlo leina atan pawisa a rûkte a hman zawh tawh avangin a pawisa ruk hmuh lêt a ni lo.