Chakma-te'n Chawngte-ah kawng an zawh

Arunachal Pradesh-a Chakma leh Hajong hnamte venghim tur leh ṭanpui tura sorkar laipui phûtin Chakma pawl hrang hrangte chuan nimin khan Chawngte (Kamalanagar)-ah kawng an zawh a, mi sang chuang an tel.

Kawngzawh huaihawttute chu - All India Chakma Students’ Union (AICSU), Young Chakma Association (YCA), Mizoram Chakma Students’ Union (MCSU), Chakma Mahila Samiti (CMS) leh Chakma National Council of India (CNCI)-te an ni.

Kawng zawhtute hian prime minister Narendra Modi leh Home minister Amit Shah hnenah memorandum an thehlut a; Arunachal Pradesh sorkarin nikuma residential proof certificate (RPC) an tihtawp chu tihnun leh a nih theih nan hma la turin an phût a ni.

RPC hi Arunachal Pradesh-a Chakma leh Hajong awmte tana zirna leh hna zawnna atana state sorkarin certificate (domicile certificate) a pek chuah ṭhin a ni a, chu chu Arunachal Pradesh sorkar chuan nikum khan a titawp a ni. Hetianga Arunachal Pradesh sorkarin a tih chhan chu - All Arunachal Pradesh Students Union (AAPSU)-in an nawr vang niin an tarlang.

Kawngzawhah hian mi sang chuang telin, an zingah zirlai ṭhahnem tak an tel a; kawngzawh huaihawttu pawl hrang hrang hruaitute'n thu an sawi a, an thil phût tarlanna lehkhate an ken bakah, an au rual bawk.