Minister-in ṭang lehzual turin IPR department-a thawkte a fuih

Information & Public Relations department-a thawkte chuan nimin khan an directorate auditorium-ah kum 2023 atana inhlan tharte hun an hmang a, IPR minister Lalruatkima'n hmanpuiin, ṭhahnemngai taka thawk a, ṭang lehzual turin a fuih.

Inkhawm hi IPR director C Lalnunkima'n a kaihruai a; Lalruat-kima chuan, IPR an enkawl journalist te, film siamtute leh, lemziak leh thlalak lama tui pawl hrang hrangte nen inrem taka kal dan an thiam a pawimawh thu a sawi a, "Mipui leh sorkarin inlaichìnna ṭha a neih theihna tura pawt hnaitu, leilâwn dawhtu department kan nihna anga ṭhahnemngai taka thawk a, ṭan lehzual a ṭul dawn a ni," a ti.

IPR Minister chuan, social media-ah thu dik tâwk lo a darh chak em em laiin IPR department-in Twitter, Instagram leh social media dangahte ṭhahnem ngai takin mipui rawng an báwl tih a sawi a, "Mipui chî-âi taka an awm lai pawhin IPR-in thuchhuah a neih loh chuan mipuite'n a dik tâwk lo a niang, tiin thuthlukna an siam mai a ni," a ti a; hripui lên laia ni tin Covid-19 dinhmun an tichhuak thei chu thawktute inpekna vang a nih thu a sawi.

Saitual, Khawzawl leh Hnahthialahte IPR pisa hawn phalna te, DC pisaa IPR awmna turte sorkarin a buatsaih chhoh zel thu te, Mizoram Information Service indaih lohna sorkarin a hria a, kum 2023-ah post panga hnawhkhah phalsak a nih thute a sawi bawk.