Meichher-a thu thawh ṭhate chawimawi

School Education department chuan nimin khan an directorate conference hall-ah School Education department buatsaih Meichher chanchinbua thuziak tawh ṭhate lawmman, Meichher Best Article of the Year leh Meichher Best Contributor of the Year lawmman an sem.

Inkhawm hi School Education director Dr H Lalthlangliana'n a kaihruai a, School Education secretary Dr Lalzirmawia Chhangte-in lawmmante a hlân. Meichher chanchinbu hi March-April 1975 khan ‘Zoram Êng’ tiin chhuah ṭan a ni a, October 1975 aṭangin ‘Meichher’ tih a ni. Chhuah a nih ṭan aṭanga tun thlengin bu 779 tihchhuah a ni tawh.

Meichher chanchinbua thu leh hla ziak ṭha leh thawh hlâwkte hnenah chawimawina hlan a ni a; Best Article of the Year-ah TC Jonunsanga, Lunglei Venglai ziah 'Aia upa zah' thlan niin, Best Contributor of the Year chu article pasarih thawhtu Ramhluna Hnamte, Luangmual, Aizawl a ni.