International Year of Millet hman a ni

Agriculture department chuan nimin khan International Year of Millet, 2023 lawmna Aijal Club-ah an buatsaih a, Agriculture minister C Lalrinsanga'n a hmanpui.

C Lalrinsanga chuan, sorkar laipuiin buhtun (millet) ṭhatzia leh ṭangkaizia hriain UNO-ah rawtna a thlen tih a sawi a, "Sorkar laipui rawtna angin kumin 2023 hi International Year of Millet-ah puan a ni. India sorkarin kum tin cheng vaibelchhe tam tak lak luh nan millet a hmang a, Mizoram pawhin kan chhawr ṭangkai ve thei a ni," a ti.

Buhtun chu Mizoram tan thil thar a ni lo tih sawiin Minister chuan, "Pi leh púte hun lai aṭanga chìn ṭan tawh a ni a, ram tan ei leh bara intodelhna kawng pawimawh tak a nih avangin Mizoram pawhin hemi lamah hian ke kan pên a ṭha," a ti a; kum bul aṭanga tih tak zeta hna thawh a, ram tan theihtawp chhuah a ṭul thu a sawi.

Sorkar thuchhuah tarlan danin, International Year of Millets bawhzui nan Mizoramah nasa taka hmalak tum mek a ni. Buhtunin lei chhia leh hmun ro a ngam a, natna leh eichhetu lian tham a neih loh avangin enkawl a nuam a, a thar hma bawk. Buhtùn chi hrang 12 a awm a, Mizorama hriat lâr chu faisa, puakzo leh buhtun a ni.