Hri danna pek chungchang sawiho

Lawngtlai District Task Force Immunisation (DTFI) chu an chairman Amol Srivastava, district bawrhsap hoin nimin khan DC conference hall-ah an ṭhukhawm a; Lawngtlai district-a hri danna (routine immunisation) pek danah thil chhinchhiah dan felfai zawk ruahman a, uluk lehzuala report pek ni se, an ti.

Amol Srivastava chuan, Lawngtlai district-in hriselna lama hma a sawn zel theih nan thawktute chu ṭhahnemngai taka kawngkal neia ruahmanna siam ṭhin turin a chah a ni.

DTFI member secretary Dr S Thaizi, district immunisation officer ni bawk leh WHO hnuaia surveillance medical officer Dr Lalhlimpuii ten hmalak dante an tarlang a; hri danna pek chungchanga harsatna awm te, ṭha leh felfai zawka kalpui a nih theihna tura rawtnate leh kum 2023-a hmalakna tur hmachhawpte an sawiho bawk.

Lawngtlai Chief Medical Officer ruahmannain Lawngtlai district-a fûr laia kalpawh harsa zual khuaahte October - December, 2022 chhung khan hri danna pek beihpui thlak a ni a; nu nau pai, nausén leh naupang hnenah hri danna chi hrang hrang - Tetanus-Diphtheria, Penta leh Measles-Rubella vaccine-te pek a ni. Kumin fûr ruahtui tlak hmain beihpui thlak leh tum a ni bawk.