Political party-te'n haw tharte an làwm

Political party ṭhenkhat chuan nimin khan thuchhuah siamin, Covid-19 vanga tangkhang state páwn aṭanga rawn hawte thinlung taka an lawm rualin, Mizoram sorkarin tih tur leh tih loh tur a tihte ṭha taka zâwm turin an ngen.

Congress ṭhalaite chuan, nimina Chennai aṭanga rél hmanga rawn hawte tluang taka an rawn thlengte bakah, a hmaa rawn haw tawhte leh hmun dang aṭanga la haw turte zawng zawng thinlung taka lawm thu an sawi a, "Lo hawte buaipuitu zawng zawng chungah lawmthu kan sawi a ni. Mahni awmna district quarantine hmun ṭheuha sorkar hotute leh Health department official-te thu ngaichâng a, dan leh thupekte ṭha taka zâwm turin kan ngenin duhsakna kan hlan a ni," an ti.

State páwna Mizo welfare hruaitu te, state danga Mizo IAS, IPS, IRS leh officer dangte chhuanawm an tih thu sawin MPYCC chuan, "An inpekna a ropui a, a taka Mizo nationalism an keng nung an ni. Mizoram sorkarin a tih theih loh, state danga officer awmte ṭhahnem­ngaihna vanga Tamil Nadu, Jharkhand, etc. sorkar hotute bia a, Mizote hawna tur leh haw kawnga ei leh in man thlenga an thawhna state sorkar an tumtir thei hi chhuanawm tak a ni," an ti. Phai lama Mizo officer-te ṭangkaizia hre thar a, central service-a tlin tuma rilru siam thar turin ṭhalaite an chah nghal a ni.

PRISM party chuan, "Sorkarin qua­rantine centre a siama awm tùr leh home quarantine tùrte'n sorkar kaihhruaina zàwm vek turin kan ngen a, task force-te pawh hripui laka mipui kan him nan sorkar kaihhruaina siam khawng taka kengkawh zel turin kan ngen a ni," an ti.

PRISM chuan, state páwna tangkhang Mizorama haw tuma inhriattir zat May 13, 2020 thlenga sorkarin a chhinchhiah chu mi 104,96 an nih thu te, rawn haw tur buaipuitu pawimawh state páwna Mizo officer-te leh Mizo welfare-te fakawm an tih thu te, Health Minister-in May 14, 2020-a a report danin, quarantine centre awm saah mi 2,357 an awm mek thu te, kohhran tam takin an hmunhmáte quarantine centre atana hman an remti chu làwmawm an tih thute an sawi bawk.